Gielda- ja guovludepartemeanta lea Nordlándda fylkkagildii juolludan 250 000 kruvnno Infonuorra-doibmii, mii lea sámi interneahttafálaldat julev-, davvi- ja oarjelsámegillii, ja dárogillii. – Dát lea dehálaš oassi ráđđehusa doaimmas lasihit sámegiela geavaheami, lohká stáhtačálli Anders J.H. Eira.

Ovttas Mánáid- ja bearašdepartemeantta 100 000 kruvdnosaš doarjagiin dán jagi, lea dát nana doarjjan sámegiel diehtojuohkimii nuoraid guovdu miehtá Sámi. Jagis 2002 juolludii Gielda- ja guovludepartemeanta 200 000 kruvnno dán ulbmilii. Sámediggi ja vihtta davimus fylkka leat maid searvan dán prošeavtta ruhtadeapmái.

Infonuorra almmuhuvvui 2001:s julevsámi interneahttabáikin Nordlándda sámi nuoraide, ja dál almmuhuvvojit siiddut maiddái davvi- ja oarjelsámegillii – lassin dárogillii. Infonuoras leat báikkálaš kántuvrrat Guovdageainnu suohkanis, Árranis Divttasvuonas ja Saemien Sijtes Snoasas. Juohke báikkálaš kantuvrras lea ovddasvástádus iežaset guovllu sámegiela siidduid dáfus.

Prošeavtta ulbmilin lea sihkkarastit sámi nuoraide relevánta dieđuid seamma dásis go dáčča nuoraide surggiin nugo oahpahus, bargu, dearvvašvuohta, astoáigi ja servodat. Sámediggepresideanta ja Nordlándda oahpahusáššiid fylkkaráđđi rahpaba siidduid almmolaččat miessemánu 13. beaivvi.

- Dán interneahttabáikki ásahemiin lea Nordlándda fylkkagielda bargan mávssolaš barggu mii lea ávkin sámi nuoraide miehtá riikka, ja lea mielde suodjaleame ja nanneme sámegiela. Lean hui ilus go ráđđehus beassá doarjut dákkár prošeavtta, lohká Anders J.H. Eira.