Luonddu- ja boazodoallobálvalusaid resursaguovddáža aiddo ásahuvvon stivrenjoavku čoahkkána vuosttaš háve Álaheajus odne, ja doaibmá johttáhuvvo jáhkkimis čakčat. Badjeolbmot geat guđđet ealáhusa, besset ávkkástallat gelbbolašvuođaineaset eará doaimmain, main gelbbolašvuohta lea erenoamáš mávssolaš.

Gielda- ja guovlodepartemeanttas lea ovddasvástádus guovddážis, ja dan ovddasteaddjit servet maid čoahkkimii. Resursaguovddáža váldoulbmil lea bargat badjeolbmuid ovdii, geat guđđet ealáhusa, ja geat ohcet molssaevttolaš bargosajiid ja dietnasiid. Guovddáš galgá dokumenteret badjeolbmuid árbevirolaš ealáhus- ja luonddugelbbolašvuođa (reálagelbbolašvuođa), ja ovddidit ja fállat bálvalusaid ee. bearráigeahččan-, gozihan-, dokumentašuvdna-, luonddu- ja birashálddašansuorggis.

- Lean movtta, go guovddáš dál viimmat ásahuvvo, stáhtačálli Ellen Inga O. Hætta dadjala. – Guovddáš mearkkaša ollu Oarje-Finnmárkku boazologu heiveheapmái, ja sáhttá addit ođđa dienasvuođu daidda, geat válljejit guođđit ealáhusa. Dat šaddá maid erenoamážit čalmmustahttit ealáhusa viiddis gelbbolašvuođa, mainna sáhttá ávkkástallat ollu eará mávssolaš doaibmasurggiin, Hætta muitala.

Sámi allaskuvlla direktevra Anders J.H. Eira jođiha stivrenjoavkku, ja oažžu ovddasvástádusa guovtti jagi áigge, goas stáhta ruhtada doaimma, ovddidit prošeavtta iehčanas doaibman, mii ieš ruhtada iežas. Stivrenjovkui gullet maiddái Norgga Boazodolliid Riikkasearvvi, Aetáhta, Finnmárkku fylkkagieldda ja Guovdageainnu suohkana ovddasteaddjit.

Oktavuođaolbmot:
Stáhtačálli Ellen Inga O. Hætta, mobiltlf. 90 10 20 55
Stivrenjoavkku jođiheaddji, Anders J.H. Eira, tlf. 78 48 77 00