Preassadiehtu

Dáhton: 27.05.05

Birasgáhttenministtar Knut Arild Hareide:

Bievlavuodjin – dáhttu buođđut loaččogieđát dispageavaheami

Birasgáhttenministtar Knut Arild Hareide finadii Guovdageainnu suohkanis 25. beaivvi miessemánus digaštallat bievlavuodjima suohkanis. Lea dárbbašlaš čavget geavahandábi sierralobi addimiin bievlavuodjimii. Hareide maiddái albmosii addá ođđa prošeavtta mii galgá hábmet ođđa mohtorjohtolatpolitihka.

- Dálá bievlavuodjin lea ilá viiddis ja birrasii šaddá ilá stuora deatta. Ođđa prošeakta, namain "Motorferdsel og samfunn" (mohtorjohtolat ja servodat), galgá ovdanbuktit buot beliid ja čuolbmagažaldagaid mohtorjohtolagas Norggas, ja ovdanbuktit evttohusa masa lea ovttaoaivilvuohta das movt hábmet boahtte áiggi mohtorjohtolatpolitihka, dadjá birasgáhttenministtar Knut Arild Hareide.

Birasgáhttenministtar finadii Guovdageainnu suohkanis digaštallat movt suohkana mohtorjohtolat meahcis dáhpáhuvvá geavatlaččat. Suohkana bovdehusa duogážin lea dat viiddis fuomášupmi maid bievlavuodjin ja suohkana dispageavaheapmi lea dagahan.

- Jus galggaš nagodit gáržžidit bievlavuodjima de lea oktasaš áddejupmi dehálaš dan hárrái ahte dát lea váttisvuohtan. Suohkanat fertejit ieža leat dáhtolaččat bargat juoidá vai gáržžidit bievlavuodjima, dadjá Hareide.

Finnmárkkus leat ásahuvvon 745 km bievlavuodjinmáđiijat. Dasa lassin lea suohkanat ásahan 2437 km nudaddjon dispaláhtuid. Oktiiibuot dahket láhtut guhkit gaskka go Lindesnesas – Nordkáhppii.

- Finnmárku lea erenoamáš rašši vaháguvvamiidda mat čuvvot bievlavuodjima. Go midjiide dieđihuvvo ahte muhtin suohkanat addet dispa dahje sierralobi árvvoštalakeahttá fievrridandárbbu dahje vejolaš birasvahágiid, de dát rihkku mohtorjohtolatlága ulbmiliid, iige dat sáhte dohkkehuvvot, dadjá Hareide.

Mohtorjohtolatgeahččaladdan mii lea leamaš jođus njeallje jagi gávcci suohkanis, loahpahuvvui 1.b. miessemánus. "Motorferdsel og samfunn"- prošeakta galgá jođihuvvot buohtalaga mohtorjohtolatgeahččaladdama loahppaárvvoštallamiin. Loahppaárvvoštallan lea gárvvis 2005' čavčča, muhto prošeakta joatká 2006' geassái.

Gulahallanolmmoš: Ossodatdirektevra Harald Smith Ruberg, tlf: 22 24 58 90