Stáhtabušeahtta:
Doarjja valáštallangilvvuide
Historjjálaš arkiiva
Almmustahttináigodat Solberga ráđđehus
Almmustahtti: Kulturdepartemeanta
Preassadieđáhus | Nr: 94/16 | Almmustahtton: 06.10.2016 | Maŋimuš ođasmahttojuvvon: 14.10.2016
Ráđđehus áigu láhčit dili vai Norga sáhttá leat riikkaidgaskasaš valáštallangilvvuid doalloisit. 2017 bušeahttaevttohusas lea doarjja Sihkkel-MM:i, Homeless World Cupii ja X Gamesii. Oktiibuot ožžot dát golbma meašttirgilvvu 63 miljovnna kruvnna stáhtadoarjjan.
Riikkaidgaskasaš valáštallangilvvut Norggas addet dehálaš movttiidahttima ja nannetjit valáštallama govdodaga. Dat maiddái váikkuhit positiivvalaččat márkanastit Norgga valáštallanriikan ja mátkeriikan. Danne berošta ráđđehus láhčit diliid vai iešguđet valáštallangilvvut sáhttet lágiduvvot Norggas.
- Ráđđehus háliida doarjut doaimmaid ja valáštallamiid – maiddái dan maid ieža lágidit. Valáštallangilvvut maid priváhta searvvit lágidit, leat lihkostuvvan bures, dadjá kulturministtar Linda Hofstad Helleland.
Sihkkel-MM 2017:s Bergenis lágiduvvo čakčamánu 16.–24. beivviid. Doalut ožžot 30 miljovnna kruvdnasaš stáhtadoarjaga johtolat-, justiisa- ja sihkkarvuođadoaibmabijuide eaktodáhtolašprográmma lassin. 21,5 miljovnna kruvnna lea máksojuvvon 2016:s, ja 2017:s evttoha ráđđehus 8,5 miljovnna kruvnna.
- Sihkkel-MM lea okta máilmmi stuorámus valáštallangilvvuin, ja šaddet stuorámus geassegilvvut mat goassige leat leamaš lágiduvvon Norggas, dadjá kulturministtar Linda Hofstad Helleland.
Homeless World Cup lea riikkaidgaskasaš spábbačiekčamat riikajoavkkuide geain leat čiekčit geain leat sosiála váttisvuođat dahje gárrenmirkováttisvuođat. Frelsesarmeen lágida čiekčamiid Oslos 2017 čavčča. Badjel 50 riikka servet.
- Homeless World Cup lea sosiála lihkadus mii lea nissoniid ja dievdduid várás geat leat servodaga ravddas. 2017:s evttoha ráđđehus 13 miljovnna kruvnna, lassin dan 2 miljovnna kruvdnii maid čiekčamat leat ožžon 2016:s, dadjá kulturministtar Linda Hofstad Helleland.
X Games lea plánejuvvon lágiduvvot Norggas (Hafjellas) njukčamánu 6.–12. beivviid 2017:s. X Games lea ekstremavaláštallankonseapta snowboard- ja freestylevaláštalliide. Juolludeami eaktun lea ahte čoavddus antidopenbargui ja doaluid ollislaš ruhtadeapmái.
- X Games fátmmasta olusiid ja čohkke mánáid ja nuoraid sihke ieš organiseren ja organiserejuvvon valáštallanbirrasiin. 2016:s juolluduvvui 8 miljovnna kruvnna doaluide. Ráđđehus čuovvola dál evttohettiin 10 miljovnna kruvdnasaš lassijuolludeami, dadjá kulturministtar Linda Hofstad Helleland.