Stáhtabušeahtta 2018
Investerendoarjja Orkla Industriijamuseai
Historjjálaš arkiiva
Almmustahttináigodat Solberga ráđđehus
Almmustahtti: Kulturdepartemeanta
Preassadieđáhus | Nr: 89/17 | Almmustahtton: 13.10.2017
Ráđđehus evttoha 35 milliuvnna ruvnna investerendoarjaga Orkla Industriijamuseai mii gullá Lulli-Trøndelaga Museaide ja mii váldo Našunála kulturvisttiid ortnegis. 5 milliuvnna evttohuvvo juolluduvvot 2018:s. Prošeavtta ulbmil lea sihkkarastit buriid lanjaid áimmahuššat ja gaskkustit dehálaš teknihkkalaš ja industriija kulturmuittuid.
Orkla Industriijamusea lea gaskkustanarena Lulli-Trøndelaga Museain ja lea Løkken Verkas Meldalas. Musea hálddaša dehálaš teknihkkalaš ja industriija kulturmuittuid mat gullet báktedoaibmabargguide Norggas, ee. Thamshavnbane.
– Orkla industriijamusea lea dehálaš arena gaskkustit industriijahistorjjá Orkdalas ja Meldalas, ja lean hirbmat ilus go dál sáhttit ollašuhttit dan. 35 milliuvnna ruvdnosaš investerendoarjagiin sáhttá stáhta gokčat goalmmádas oasi prošeavtta goluin. Orkla industriijamusea hálddaša dehálaš oasi norgga kulturárbbis ja historjjás Norgga birra industriijaservodahkan – historjá maid mii galgat váldit váras, lohká kulturministtar Linda Hofstad Helleland.
Orkla Industriijamusea gaskkusta dieđuid daid dehálaš báktedoaimmaid birra mat ledje doppe 1600-logu loahpageahčen. Musea hálddaša dehálaš teknihkkalaš ja industriija kulturmuittuid, ee. Gammelgruva ja Thamshavnbáne. Thamshavnbána lei doaimmas 1908-1974 áigodagas ja lea dat boarráseamos elrávdnje-ruovdemáđii máilmmis maid doaimmahedje ovttafása allagealdda vurrolat-elrávnnjiin ja mii ain lea doaimmas. Danne lea das earenoamáš sadji musearuovdemáđijaid gaskkas, maiddai riikkaidgaskasaččat. Lea guhká leamašan garra dárbu oažžut ođđa vuovdnahálla ja divohaga vai nákcet sihkkarastit dohkálaš vurkodeami lokomotiivvaide, sáhtto- ja kiisevuovnnaide olles dán johtolatbána doaibmaáiggis.
– Biddjo ollu eaktodáhtolaš barggut ruovdemáđidjabiergasiid teknihkkalaš dibasteapmái. Ođđa vuovdnahálla ja divohat buoridivččii bargodilálašvuođaid eaktodáhtolaš bargiide, lohká kulturministtar Linda Hofstad Helleland.
Musea dárbbaha maiddái ođđa čájáhus- ja gaskkustanlanjaid ja dárbbašlaš saji guossástalliide. Dát dárbbut ollašuvvet dál go ođđa museavisti huksejuvvo dohko, ja váikkuha maiddái dasa ahte nákce loktet Trøndelaga turismaregiovdnan.