Historjjálaš arkiiva

Háliidat bissehit olgoriikalaš ruhtaspealuid máinnusteami

Historjjálaš arkiiva

Almmustahttináigodat Solberga ráđđehus

Almmustahtti: Kulturdepartemeanta

Kulturdepartemeanta lea sádden gulaskuddamii rievdadusevttohusa áibmomedialáhkii. Ulbmil lea bissehit olgoriikalaš ruhtaspeallanmáinnusteami, hehtten dihte speallansorjavaččaid vásiheames dákkár máinnustemiid.

Norggas háliidat vuhtiiváldit sin geain leat speallanváttisvuođat ja dan geažil doaimmahuvvojit ge ruhtaspealut oktovuoigatvuođamodealla bokte, ja Norggas ii leat lohpi ruhtaspealuid máinnustit liseanssa haga. Almmatge dáhpáhuvvá ahte hui ollu ruhtaspealut  márkanfievrriduvvojit TV bokte norgga ruovttuin juohke vahku.

-Ráđđehus meannuda ruhtaspeallanváttisvuođaid hui duođalaččat, ja háliida ráddjet olgoriikalaš ruhtaspealuid máinnusteami gáhtten dihte sin geain leat speallanváttisvuođat, dadjá kultur- ja dásseárvoministtar Trine Skei Grande.

Maŋimuš álbmotiskkadeapmi 2015:s meroštalai ahte Norggas leat oktiibuot 122 000 olbmo geain leat speallanváttisvuođat dahje váruhuvvojit dohppehallot heajos speallanmeanuide. Ja sin oapmahaččaid lassin guoská speallanváttisvuohta máŋga duhát olbmui.  

-Das lea sáhka árvoválljemis. Mii háliidat vuhtiiváldit buohkaid geat rahčet speallanváttisvuođaiguin ja oaivvildat ahte speallamii darvánan olbmuid vuhtiiváldin lea deháleabbo go vejolaš ekonomalaš váikkuhusat, joatká kultur- ja dásseárvoministtar.

Kulturdepartemeanta áigu maid gohčut Lotteriijabearráigeahčču čielggadit evttohusa nu gohčoduvvon DNS-dieđiheami birra, mii sihkkarasttášii dan ahte sii geat geavahit olgoriikalaš ruhtaspeallofitnodagaid neahttasiidduid ožžot dieđu ahte gustovaš spealut dieid neahttasiidduin leat lobiheamit Norggas. 

Gustovaš ruhtaspealloláhkamearrádusaid ii leat vejolaš geavahit giehtaguššat márkanfievrridangildosa olgoriikalaš aktevrraid ektui. Danne evttohat áibmomedialáhkii ođđa mearrádusa. Mearrádus attášii Mediabearráigehččui láhkavuođu gieldit dahje váttásmahttit ruhtaspealuid márkanfievrrideami mii Norggas ii leat lobálaš.

Dat geatnegahtášii sin geat fievrridit TV ja audiovisuála diŋgonbálvalusaid, ovdamearkka dihte TV-vuovdaleddjiid dahje govdafierbmelágideddjiid čuovvut láhkamearrádusaid. Jos ruhtaspeallomáinnusteapmi jávkaduvvo sáhttá dat addit ekonomalaš váikkuhusaid TV-kanálaide ja digitála bálvalusaide mat gávdnojit Norgga riikka olggobealde. Departemeanta sádde ášši gulaskuddamii vai nu ollugat go vejolaččat sáhttet buktit oaiviliiddiset vejolaš váikkuhusaid birra. 

Lotteriijabearráigeahču raporta maid Rambøll Management Consulting čađahii 2018:s čájeha  ahte okta olmmoš gii gaskamearálaččat geahččá TV guokte diimmu beaivválaččat sáhttá ovtta vahkus oaidnit sullii 24 ruhtaspeallomáidnosa. Olgoriikalaš speallanfitnodagat geavahit golmma geardde eanet go norgga ruhtaspeallofitnodagat TV-máinnusteapmái. Norsk Tipping ja Norsk Rikstoto fertejit čuovvut sierra márkanfievrridannjuolggadusaid. 

Gulaskuddanáigemearri lea geassemánu 17.b. 2019.