2021 stáhtabušeahtta:
200 miljovnna kruvnno lassidoarjjan museaide ja musihkka- ja lávdedáiddaásahusaide
Historjjálaš arkiiva
Almmustahttináigodat Solberga ráđđehus
Almmustahtti: Kulturdepartemeanta
Preassadieđáhus | Nr: 113/20 | Almmustahtton: 07.10.2020 | Maŋimuš ođasmahttojuvvon: 09.10.2020
Ráđđehus háliida movttiidahttit lágidit doaimmaid ja fálaldagaid gehččiide ja sihkkarastit ahte ásahusaid bargit sáhttet ain joatkit barggus. 140 miljovnna kruvnno geavahit musihkka- ja lávdedáiddasuorggi ásahusaide ja 60 miljovnna museaide.
– Dát ásahusat leat mávssolaččat olles Kultur-Norgii ja doarjagiin addet gehččiide miehtá riikka dássidis kulturfálaldaga váttis áigodagas. Lean hui movtta go dál sáhttit lasihit museaid ja musihkka- ja lávdedáiddaásahusaid doarjaga 200 miljovnnain kruvnnuin vuosttaš jahkebealis 2021, dadjá kultur- ja dásseárvoministtar Abid Q. Raja.
Museat ja musihkka- ja lávdedáiddaásahusat, mat doibmet almmolaš ruhtademiin, leat kultuvrralaš infrastruktuvrra mávssolaš oassi. Máŋga ásahusa leat sorjavaččat iežaset boađuin, vai sáhttet doalahit doaimmaid dohkálaš dásis ja addit gehččiide buori fálaldaga.
Covid-19 geažil ásahuvvon ráddjehusat dahket váttisin ásahusaide háhkat iežaset boađuid. Seammás dat báhcet máŋgga eará movttiidahttindoaimma olggobeallái, daningo stuorra oassi daid boađuin bohtet almmolaš doarjjan.
Ráđđehus lasiha danin museaid ja musihkka- ja lávdedáiddaásahusaid doarjaga oktiibuot 200 miljovnnain vuosttaš jahkebealis 2021. Ulbmilin lea movttiidahttit daid lágidit doaimmaid, ja sihkkarastit ahte ásahusaid bargit besset ain joatkit barggus.