Historjjálaš arkiiva

2021 stáhtabušeahtta:

Nannejit áŋgiruššama vealaheami, rasismma ja vaššiságaid vuostá 10 miljovnnain kruvnnuin

Historjjálaš arkiiva

Almmustahttináigodat Solberga ráđđehus

Almmustahtti: Kulturdepartemeanta

– Vealaheapmi, rasisma ja vaššiságat geahnohuhttet min demokratiija. Danin mii dahkat dál álkibun eaktodáhtolaš organisašuvnnaide ja báikkálaš eiseválddiide čađahit doaimmaid daid vuostá, dadjá kultur- ja dásseárvoministtar Abid Q. Raja.

Ráđđehus árvala ásahit sierra doarjjaortnega, masa juolludit 8 miljovnna kruvnno bargui vealaheami, rasismma ja vaššiságaid vuostá.

Ortnega vehkiin sáhttet earret eará eaktodáhtolaš searvvit ja báikkálaš eiseválddit ohcat doarjaga doaimmaide, maiguin ovddidit máŋggabealatvuođa ja gulahallama, ja barget rasismma ja vaššiságaid vuostá. Ortnega ulbmilin lea láhčit dili dasa ahte sáhttet áŋgiruššat báikkálaččat, guovllu dásis ja riikka dásis, ja doarjut sin geat háliidit ovddidit dán barggu.

– Dieđán ahte ollu gielddain ja servviin leat jo buorit jurdagat ja prošeavttat. Siviila servodat lea mávssolaš rasismma, vealaheami ja vaššiságaid vuostálasti. Ođđa ortnegiin mii háliidit ovddidit máŋggabealatvuođa ja gulahallama.

Mánáid-, nuoraid- ja bearašdirektoráhtta hálddaša ortnega Kulturdepartemeantta beales.

Ráđđehus árvala maid nannet lhbtiq-servviid dálá doarjjaortnega 2 miljovnnain kruvnnuin. Dan láhkai besset searvvit lágidit eanet doaimmaid.

–  Mii háliidit doarjut guottuid rievdadeami ja ráhkadit eanet rabas ja oadjebas sosiála arenaid, vai lhbtiq-olbmot ja olbmot, geaid sohkabeali ovdáneames lea variašuvdna, besset searvat ja nannet identitehtaset.