Norgga Boazosápmelaččaid riikkasearvvi gáibádus geigejuvvon
Historjjálaš arkiiva
Almmustahttináigodat Solberga ráđđehus
Almmustahtti: Eanandoallo- ja biebmodepartemeanta
Ođas | Almmustahtton: 07.01.2021 | Maŋimuš ođasmahttojuvvon: 11.01.2021
Norgga boazosápmelaččaid riikkasearvvi (NBR) gáibádus 2021/2022 boazodoallošiehtadussii lea odne geigejuvvon stáhtii. Eanadoallo- ja biebmodepartemeanta šiehtadallá boazodoallošiehtadusa jahkásaččat NBR:n. Gustovaš njoammuneastadandoaimmaid geažil geigejuvvui gáibádus videočoahkkima bokte.
Gáibádusa ekonomalaš rámma lea 211,85 miljovnna kruvnno. Dat lea 62,35 miljovnna kruvnno eanet go gustovaš boazodoallošiehtadus, mii lea 149,5 miljovnna kruvnno. Lassáneapmi dahká 41,7 proseantta.
- Loga NBR gáibádusa dáppe (pdf)
NBR čujuha erenoamážit dasa ahte dál lea erenoamáš dárbu geahpedit boazomassimiid boraspiriide ja sihkkarastit boazodoalu eatnamiid vai boazodoallu šaddá ceavzilis ealáhussan. Ođđa boazodoallošiehtadusas lea NBR vuoruhan doaibmabijuid mat veahkehivčče orohagaid bargat areálaáššiiguin. NBR gáibida lasihit njuolggodoarjagiid ja evttoha ásahit ollu ođđa doarjjaortnegiid. NBR maid háliida lasihit Boazodoalu Ovdánahttinfoandda friijaruđaid.
Ekspedišuvdnahoavda Viil Søyland lea stáhta šiehtadallanlávdegotti ođđa jođiheaddji. – Jahki 2020 lea leamaš váttis jahki boazodollui. Boazodoallu vásihii duođalaš guohtunroasu, lassin korona-njoammudávdaleavvama, mii ii leat vel nohkan. Dat dieđusge váikkuha dán jagi šiehtadallamiidda, muhto mun illudan buriid ságastallamiidda NBR:n, dadjá Søyland.
Stáhta fálaldat ovddiduvvo bearjadaga ođđajagimánu 29.b.2021, ja šiehtadallamat galget loahpahuvvot maŋimustá njukčamánu 1.b.2021.