Ovttamielalašvuohta eanadoallošiehtadussii

2015-2016 Eanadoallošiehtadusa ekonomalaš rámma lea 400 miljovnna kruvnnu. Dat  ruhtaduvvo 315 miljovnna kruvnnu sturrosaš mearreruhtalassánemiin, ja stáhtabušeahta juolludusa lassánemiin mii lea 45 miljovnna kruvnnu, ja go eanadoallogessosa árvu lassána 10 miljovnna kruvnnuin, ja 30 miljovnna sirdojuvvo 2014 bušeahtas. 

3,75 proseantta

Juolludusrámma mielde lassána sisaboahtu juohke jahkebargui 3,75 proseantta  2015 rájes 2016 rádjai. Go árvvoštallá bálkábargiid sisaboahtolassáneami 2015 šiehtadusain, de boanddat jáhkkimis ožžot 2016:s stuorit sisaboahtolassáneami go bálkábargit. Šiehtadus mielddisbuktá ahte sisaboahtu juohke jahkebargui lassána 12,75 proseantta jagi 2014 rájes 2016 rádjai. Dat lea sullii beali eanet go dat maid prognosat čájehit bálkábargiid ektui. 

Rievdadusat bissot

Mun šállošan go Norgga Boanddaid- ja Smávvadálolaččaidsearvi válljii botket dán jagi eanadoallošiehtadallamiid, ja eai dohkkehan fálaldaga mii boanddaide addá sisaboahtolassáneami mii lea ollu eanet go dan maid eará joavkkut sáhttet vuordit, cealká eanadoallo- ja biebmoministtar Sylvi Listhaug.

-Lean duhtavaš go dál leat soahpan eanadoallošiehtadusa Norgga Boanddaidservviin. Dat mielddisbuktá ahte dehálaš rievdadusat diimmá eanadoallošiehtadusas bissot, ahte ollesáiggeboanddaid ja sin dilli geat buvttadit ollu borramuša nannejuvvo.     

-Lean ilus go mii dán jagi eanadoallošiehtadusa bokte beassat čađahit 14 álkkásmahttin doaibmabiju, earret eará go heaittihat muhtun dárbbašmeahttun doarjjaortnegiid. Erenoamážit fievrridandássendoarjaga náhkkeealáhussii. Lean maid duhtavaš go dál álggahuvvo bargu  čorget vuovdiluvvan kultureanadagaid Vestlánddas, dadjá eanadoallo- ja biebmoministtar Sylvi Listhaug. 

2015-2016 eanadoallošiehtadusa ekonomalaš rámma 

 

	Milj. kruvnnu
Mearreruđaid oppalaš lassáneapmi 01.07.15 rájes	315
Kap. 1150 Lassi juolludus  2016:s	45
2014 sirdojuvvon ruđat	30
Eanadoallogessosa árvolassáneapmi	10
OKTIIBUOT	400

130 kruvnnu jahkásaččat gaskamearálaš báikedollui 

Mearreruđaid rievdadusat váikkuhit ahte hattit lassánit geavaheddjiid ektui sullii ovtta njealjádas proseanttain, dahje badjelaš 130 kruvnnu gaskamearálaš báikedollui. Borramušgálvoindustriija gilvofápmu bisuhuvvo go Eurohpás muđui leat vuollegis hattit. Fuođđariid haddemearit bissot rievddakeahttá. Dat lea mávssolaš boaittobealeeanadollui.

Eará doaibmabijut

 

• Fievrridandássendoarjja náhkkeealáhussii heaittihuvvo, dan geažil go dat lea máilmmimárkanealáhus
• Investerendoarjaga juolludusrámma lasihuvvo 20,0 milj. kruvnnuin. Reantodoarjjaortnet heaittihuvvo. 
• Ásahuvvo ođđa ortnet vuovdiluvvan eanadagaid čorget Vestlánddas.
• Gilvojuvvon gittiid meroštallanortnet  joatkašuvvá  rievddakeahttá 2015 rájes
• Fuođđariid haddemearit eai rievdaduvvo. 
  
  
• Eanadoallošiehtadallamat 2015 – Stáhta ja Norgga Boanddaidsearvvi gaskasaš šiehtadallančoahkkima loahppaprotokolla miessemánu 15.b. (pdf)