Historjjálaš arkiiva

Bággoluomu áigodat guhkiduvvo 52 vahkkui

Historjjálaš arkiiva

Almmustahttináigodat Solberga ráđđehus

Almmustahtti: Bargo- ja sosiáladepartemeanta

Ráđđehus viiddida bággoluomu áigodaga 52 vahkkui skábmamánu 1. beaivvi rájes amas bargit eai eretcelkojuvvo barggus.

Koronadávda lea garrasit čuohcan norgga ekonomiijadillái. Ollugat leat dađibahábut barggu massán, ja hui ollugat leat gártan baggolupmui.

Dál áigu ráđđehus guhkidit bággoluomu áigodaga 26 vahkus 52 vahkkui.

– Mii almmuheimmet juo ovdal geasi ahte mii čuovvut bargomárkandili hui dárkilit, ja ahte mii áigut borgemánus árvvoštallat dárbbu guhkidit bággoluomu áigodaga ain eanet. Jos vel   ekonomiijadilli muhton muddui orru buorre, de lea dilli ain nu eahpečielggas ahte mii válljet guhkidit bággoluomu áigodaga 26 vahkus 52 vahkkui skábmamánu 1. beaivvi rájes, cealká bargo- ja sosiálaministtar Torbjørn Røe Isaksen.

Bággoluomu áigodaga guhkideapmi mielddisbuktá ahte ealáhuseallin buorebut nagoda hálddašit koronadili.

– Rievdadeapmi addá ealáhuseallimii vejolašvuođa buorebut ceavzit roasus, ja erenoamážit mátkeealáhussii masa koronadilli lea sakka čuohcan. Ollu fitnodagat sáhttet massit dárbbašlaš gelbbolašvuođa koronaroasu geažil. Guhkiduvvon bággoluomu áigodat galggašii dili buoridit. Muđui lea dehálaš ahte ealáhuseallin joatká dárbbašlaš nuppástuhttindoaimmaid ja ahte gánnáhahtti fitnodagain leat bargit geain lea nana gelbbolašvuohta, dadjá ealáhusministtar Iselin Nybø. 

Seammás lea dehálaš ahte bargoaddi dađistaga árvvoštallá lea go dárbu bargiid bidjat bággolupmui. Gánnáhahtti fitnodagaide lea dehálaš ahte sis leat doarvái bargit. Ráđđehus evttoha dan lassin viđa beaivásaš bargoaddiid bálkámáksináigodaga II maŋŋil 30 vahku bággoluomu. Ortnet doaibmagoahtá ođđajagimánu 1.b. 2021.    

– Bargomárkandilli lea dađis ovdánan miessemánu rájes, ja lohku sis geat leat bággoluomus lea sakka njiedjan. Almmatge orru nu ahte fitnodagaide ja industriijafitnodagaide šaddá hui váttis ja eahpesihkkaris dilli dán čavčča. Danne guldalat maid bargoeallima bealálaččat oaivvildit ja guhkidat bággoluomu áigodaga, dadjá bargo- ja sosiálaministtar Torbjørn Røe Isaksen. 

Ráđđehus lea meroštallan ahte rievdadusaide lea dárbu go norgga ekonomiija dál lea erenoamáš váttis dilis, ja ahte guhkiduvvon bággoluomu áigodat galgá leat gaskaboddosaččat. Ráđđehus lea maid meroštallan ahte bargoaddiid bálkágeatnegasvuođa beivviid geahpedeapmi galgá fas rievdaduvvot 26 vahkkui jos bargit biddjojit bággolupmui maŋŋil geassemánu 30.b. 2021, jos dilli lea buorránan.   

Dál go bággoluomu áigodat guhkiduvvo 52 vahkkui skábmamánu 1.b.rájes, de doaibmagohtet dábálaš njuolggadusat maid vuođul bággoluomu áigodat galgá árvvoštallojuvvot 18 mánu siste.  

Rievdadusat váikkuhit 2020 bušehttii. Ráđđehus áigo danne ovddidit Stuoradiggái bušeahttarievdadusa sierra proposišuvnna bokte.