Girdimátkkošteaddjidivat fápmuibiddjo geassemánu 1.b.
Historjjálaš arkiiva
Almmustahttináigodat Solberga ráđđehus
Almmustahtti: Ruhtadandepartemeanta
Preassadieđáhus | Nr: 14/2016 | Almmustahtton: 17.03.2016 | Maŋimuš ođasmahttojuvvon: 18.03.2016
Finánsadepartemeanta lea odne mearridan maŋidit girdimátkkošteaddjidivvaga fápmuiboahtima. – Girdimátkkošteaddjidivat ásahuvvo nugo Stuorradiggi lea mearridan, muhto maŋiduvvo geassemánu 1.b. rádjai, dadjá finánsaministtar Siv Jensen (OB).
- Mii doalahat dan ahte girdimátkkošteaddjidivat ja transferluvven ii atte stáhtadoarjaga, ja ahte ortnet ii leat min oainnu mielde notifiserengeatnegas ESA:i. Go ESA dattetge áigu meannudit ášši ja lohpida jođánis mearrádusa, de lea min mielas jierpmálaš maŋidit divvaga. Nu garvit mii riskka ruovttoluottamáksit vejolaš doarjagiid, dadjá finánsaministtar Siv Jensen (OB).
2016’ bušeahta meannudeami oktavuođas mearridii Stuorradiggi ásahit girdimátkkošteaddjidivvaga. Stuorradiggi eaktudii divvaga fápmuibiddjot cuoŋománu 1.b. 2016, muhto attii departemeantta válddi fápmuibidjat divvaga.
Girdimátkkošteaddjidivvaga gulaskuddama oktavuođas čuoččuhuvvui ahte divat rihkku EEO-šiehtadusa stáhtadoarjjanjuolggadusaid. Mannan vahkus mearridii EFTA’ vákšunorgána (ESA) meannudit ášši.
ESA lea dovddahan ahte sáhttet jođánit árvvoštallat stáhtadoarjjarievttálaš beliid. ESA ja Finánsadepartemeanta leaba juo gulahallamin.
- ESA mearrádusa vuordin oadjuda divatvuođu ja sihkkarastá ahte divat fápmuibiddjo, nu ahte ii leat riska gáibidit vejolaš doarjaga ruovttoluotta máksit, dadjá finánsaministtar Siv Jensen (OB).