Nannet gulahallama sámi beroštumiiguin davviguovlluid ealáhusovdánahttima oktavuođas
Historjjálaš arkiiva
Almmustahttináigodat Solberga ráđđehus
Almmustahtti: Gielda- ja ođasmahttindepartemeanta
Preassadieđáhus | Almmustahtton: 12.05.2015
- Lea dehálaš ahte sámi beroštumit ovddidit áššiideaset ámmátlaččat, ja ahte sii gáibideaddji áššiin árrat besset gulahallagoahtit iešguhtet ealáhusberoštumiiguin, cealká Gielda- ja ođasmahttinministtar Jan Tore Sanner. Ráđđehus árvala buoridit gulahallama ja juolluda sámi beroštumiide 1 miljovnna ealáhusovdánahttima áigumušaid oktavuođas davviguovlluin.
Davviguovlluin leat rikkis luondduresurssat ja dáid guovlluin leat ollu ealáhusain sierralágan beroštumit. Dat sáhttá muhtumin mielddisbuktit vuostálasvuođaid ja riidduid.
- Buriid čovdosiid lea vejolaš gávdnat go váttis áššiid gieđahallá vuđolaččat, maiddái doppe gos leat vuostálas beroštumit. Midjiide lea dehálaš ahte sámi beroštumit bures besset ovddidit áššiideaset ja ahte sii árrat juo leat mielde áššemeannudeames, cealká Sanner.
Ráđđehus árvala reviderejuvvon nationála bušeahtas lasihit Sámedikki vuođđodoarjaga 1 miljovnna kruvnnuin sámi ásahusaid ja organisašuvnnaid várás mat ovddidit sámi beroštumiid.
- Ruđat galget geavahuvvot ovddidit sámi beroštumiid dakkár áššiin mat gusket luondduresurssaide ja eará sisabahkkemiidda árbevirolaš sámi guovlluin. Sámediggi mearrida ruhtajuohkimiid, dadjá Sanner.
Gielda- ja ođasmahttindepartemeantta preassatelefovdna: 22 24 25 00