Historjjálaš arkiiva

Ássandoarjja oktasaš ássanviesuide

Historjjálaš arkiiva

Almmustahttináigodat Solberga ráđđehus

Almmustahtti: Gielda- ja ođasmahttindepartemeanta

Ráđđehus evttoha rievdadit njuolggadusaid vai sii geat ásset oktasaš viesuin (oktasaš kievkkan ja beaivelatnja) sáhttet oažžut ássandoarjaga. Go ráđđehus dál rievdada ortnega, de dat dahká gielddaide vejolažžan johtileappot ásaiduhttit báhtareddjiid. Dat mielddisbuktá ahte báhtareaddjit johtileappot integrerejuvvojit, erenoamáš nuorra rávisolbmot, cealká gielda- ja ođasmahttinministtar Jan Tore Sanner.

Ássandoarjjaortnega njuolggadusevttohus ovddiduvvo reviderejuvvon nationálabušeahta 2016 bokte. –Ássandoarjja addá oadjebas ássandilálašvuođa duhát viissaid bearrašiidda, ja ollu mánáide buriid bajásšaddaneavttuid. Gielddat galget ásaiduhttit báhtareddjiid geat leat ožžon ássanlobi ja ássandoarjja lea dasa buorre gaskaoapmi, dadjá Sanner.

Ráđđehus háliida addit gielddaide stuorit doaibmamuni ásaiduhttinbarggus. Gielddat ožžot de vejolašvuođa dohkkehit viesuid oktasaš ássanviessun dearvvašvuođa- ja sosiálagáibádusaid mielde, nu ahte ássit sáhttet ohcat ássandoarjaga.

-Mii fertet geavahit olles viessomárkana ásaiduhttit báhtareddjiid ja sin geat ellet váttis dilis. Muhtun gielddain leat eanet stuora bearašviesut go smávva ásodagat gos leat guokte dahje golbma lanja maid olbmot sáhttet láigohit.  Gielddaide galgá leat vejolaš geavahit olles viessohivvodaga njuovžilit, dadjá Sanner.

Dálá ássandoarjjanjuolggadusaid mielde eai oaččo sii geat leat váttis dilis ássandoarjaga jos ásset dakkár oktasašviesuin maid gielda ii eaiggát. Dat mielddisbuktá ahte gielddat eai álo hálit ásaiduhttit olbmuid oktasašviesuide jos vel ássiide ja servodahkii livčče ge dat hui vuogas ja ávkkálaš.

Doaivumis Stuoradiggi dohkkeha ortnega ovdal geasi

Ráđđehus evttoha dán doaibmabidjui juolludit 21 mill. kruvnnu reviderejuvvon nationálabušeahtas . Rievdadus gáibit smávit láhkarievdadusaid. Gielda- ja ođasmahttindepartemeanta sádde dan geažil evttohusa mo ássandoarjjalága galggašii rievdadit gulaskuddamii ja das lea oanehis gulaskuddanáigemearri. Ulbmil lea addit olbmuide, geat ásset oktasašviesuin vejolašvuođa ohcat ássandoarjaga juo čavčča rájes.

-Dat lea buorre doaibmabidju ásaiduhttit báhtareddjiid ja dan leat ollu gielddat váillahan. Dan dihte bargat maid sáhttit vai rievdadus fápmuduvvo juo suoidnemánu 1.b. ja doaivumis Stuoradiggi dan čuovvola johtilis áššemeannudemiin, joatká Sanner.

Son deattuha ahte dat ii leat servodatekonomalaččat gánnáhahtti iige oktiige buorre ahte báhtareaddjit ásset menddo guhká dorvoohcciid vuostáiváldinbáikkiin maŋŋil go leat ožžon ássanlobi.

-Báhtareddjiide geat leat ožžon ássanlobi lea dehálaš beassat álggahit árgabeaivviset ođđa ruovttugielddas nu johtilit go vejolaš, loahpaha Sanner.

Stuoradiggi ávžžuhii 2015 ráđđehusa čielggadit vejolašvuođaid juolludit ássandoarjaga olbmuide geat ásset oktasaš ássanviesuin (nr. 800 (2015-2016). Ráđđehusa evttohus čuovvola ávžžuhusmearrádusa.