Gulaskuddan Norgga sámegiel ja kvenagiel nama birra
Historjjálaš arkiiva
Almmustahttináigodat Solberga ráđđehus
Almmustahtti: Gielda- ja ođasmahttindepartemeanta
Preassadieđáhus | Almmustahtton: 20.10.2020
− Ráđđehus áigu čalmmustahttit sámi gielaid ja kvena giela. Mii leat danne rámis evttohit Gonagasriikka Norgga sámegiel ja kvenagiel namaid, lohká guovllu- ja digitaliserenministtar Linda Hofstad Helleland.
Ráđđehus sádde odne gulaskuddamii evttohusa mearridit Norga/ Norgga Gonagasriika (davvisámegillii), Nöörje/ Nöörjen Gånkarïjhke (lullisámegillii) ja Vuodna/ Vuona Gånågisrijkka (julevsámegillii) Norgga ja Gonagasriikka Norgga almmolaš namman.
Ráđđehus evttoha Norja Norgga almmolaš kvenagiel namman, ja gonagasriikii evttohuvvojit fas guokte iešguđetlágan kvena sáni namman, Kuningsvaltakunta ja Kuningasriikki, mat galget gulaskuddot.
Departemeanta lea maiddái ráhkadan evttohusa njuolggadusaide namaid almmolaš geavaheapmái.
Evttohus sáddejuvvo gulaskuddamii Sámi giellavahku. Giellavahkku galgá veahkehit loktet sámi gielaid árvvu ja lassánahttit máhtu gielaid birra servodagas. Ráđđehus oaivvilda giellavahkku lea buorre dilálašvuohta sáddet evttohuvvon našuvdnanamaid gulaskuddamii.
– Mii diehtit ahte lea leamaš sávaldat sámi ja kvena birrasiin oažžut sámegiel ja kvenagiel našuvdnanamaid. Dat lea deaŧalaš gielaid oainnusmahttimii. Sámediggi háliida earret eará bidjat riikarádješilttaid main leat sámi giellahámit muhtun guovlluide. Dat šaddá vejolaš go mii oažžut ođđa, almmolaš našuvdnanamaid, dadjá Helleland.
Gonagasriika Norgga sámegiel ja kvenagiel almmolaš namaid sisafievrredeapmi nanne ja čalmmustahttá Norgga máŋggabealat, máŋggagielat stáhtan.
– Mii leat hui ilus sáddet evttohusa gulaskuddamii giellavahkus ja sávvat namat váldojuvvojit viššalit atnui ja ahte mii oažžut olu buriid oainnuid gulaskuddamii, loahpaha Helleland.ov