Sámi giellabálkkašupmi – Gollegiella juhkkojuvvo ovccát háve

Dán jagi bálkkašumi juogadeaba Ellen Pautamo, gii lea ovddidan sámegiela gáiddusoahpahusa, ja Jonar Thomasson, gii lea čohkken ja gaskkustan máttasámegiela ja máttasámegiel máidnasiid.

– Lea illu ja gudni beassat sávvat lihku dán čeahpi guoktái Gollegiela – davviriikkalaš sámi giellabálkkašumi ovddas. Sámegielaid sihkkarastin boahtteáigái gáibida nana áŋgirvuođa mis buohkain. Vuoiti guovttos, geaid mii odne ávvudit, leaba eallinagiset bargan sámegielaid ovdii, ja leaba bargan dan ovdii ahte leat šaddan ođđa sámegiela geavaheaddjit, dadjá guovllu- ja digitaliserenministtar Linda Hofstad Helleland.

Vuoiti guoktá birra

Ellen Pautamo lea máŋggaid jagiid leamaš bálggisčuollin sámegiela gáiddusoahpahusa ovddideames Suoma bealde. Son lea čađat ohcan ja váldán atnui ođđa reaidduid, maiguin buoridit oahpahusa kvaliteahta. Su dehálaš bargun lea maid leamaš oahpahit eará oahpaheddjiide gáiddusoahpahusa bargovugiid. Son lea bargguinis movttiidahttán ollugiid oahppat davvisámegiela.

Jonar Thomasson lea nuorravuođa rájes čohkken dieđuid vuorrasut sápmelaččain. Son lea dokumenteren máttasámegiela ja gaskkustan dan viidáseappot barggadettiinis giellakonsuleantan Gïeleaernie giellaguovddážis, Raavrhvijhke (Røyrvik) gielddas. 2019 son almmustahtii girjji Mojhtsistie - fra minnene, mas leat muitalusat, sátnelisttut ja dadjanvuogit máttasámegillii. Iežas bargguid bokte son movttiidahttá ollugiid váldit gielaset ruovttoluotta.

Juhkkojuvvui vuosttaš háve 2004

Giellabálkkašupmi, mii lea 15 000 euro, juhkkojuvvui vuosttaš háve 2004. Bálkkašumi sáhttet juohkit ovttaskas olbmuide, joavkkuide, servviide dahje ásahusaide, mat leat bargan mávssolaš barggu sámegielaid ovdii.