Historjjálaš arkiiva

Festivála-Norga nu go ovdal

Historjjálaš arkiiva

Almmustahttináigodat Solberga ráđđehus

Almmustahtti: Justiisa- ja gearggusvuođadepartemeanta

Justiisa- ja gearggusvuođaministtar Per-Willy Amundsen sihtá Politiijadirektoráhta (POD) ruovttoluotta geassit reivve politiijaguovlluide mas direktoráhta dulko alkoholalága njuolggadusaid čavggabut festiválalágideddjiid ektui. Amundsen háliida dan sadjái ahte árvvoštallamat dahkkojit báikkálaččat .

– Mun lean bagadan POD geassit ruovttoluotta reivve festivála rámmaeavttuid birra mii lea sáddejuvvon politiijaguovlluide. Dat mearkkaša ahte festivála-Norga galgá doaibmat nu go ovdal. Buot jierpmálaččamus lea ahte festivála guoskevaš rámmat árvvoštallojuvvojit báikkálaččat. Nu leamaš ovdal, ja nu galgá maid boahtteáiggis, cealká justiisa- ja gearggusvuođaministtar Per-Willy Amundsen.

Skábmamánu álggus sáddii POD reivve politiijaguovlluide mii dulkojuvvo dainna lágiin ahte alkoholanjuolggadusat leat čavgejuvvon festiválaid dáfus. Dan maŋŋil leat leamaš ságastallamat Justiisa- ja gearggusvuođadepartemeantta ja Dearvvašvuođa- ja fuolahusdepartemeantta gaskka, earret eará das mo alkoholalága njuolggadusat dulkojuvvojit.

Dan oktavuođas go ávžžuhat POD geassit ruovttoluotta reivve politiijaguovlluide, de ovddidat máŋga ášši maid báikkálaš politiijaeiseválddit berrejit árvvoštallat. Earret eará ahte festiválabáikkis mearridit guovlluid gos lea ja ii leat lohpi vuovdit alkohola. Das deattuhuvvo ahte alkoholalága njuolggadusat eai gusto viessovovnnaide, ássanbiillaide ja tealttáide, mat eanemustá geavahuvvojit priváhta oktavuođas.

– Lea dehálaš ahte báikkálaččat álggahit eastadeaddji doaibmabijuid jos lea dárbu. Ja eavttut maid vejolaččat berre mearridit iešguđet lágideddjiide galget árvvoštallojuvvot áššis áššái, dadjá justiisa- ja gearggusvuođaministtar Amundsen.

POD:i sáddejuvvon reivves celkojuvvo earret eará ahte gáibidit alkohola vuovdinlobi olles festiválabáikái lea ollu stuorit ášši go ovdamearkka dihte gáibidit bearráigeahču guovlluide gos ii leat lohpi vuovdit alkohola.

Reivve Politiijadirektoráhttii festivála rámmaeavttuid birra (PDF-dušše dárogillii)