Nuoraid ráŋggášteapmi veahkeha nuorra vearredahkkiid rievttes geainnuide
Historjjálaš arkiiva
Almmustahttináigodat Solberga ráđđehus
Almmustahtti: Justiisa- ja gearggusvuođadepartemeanta
Preassadieđáhus | Nr: 27 – 2017 | Almmustahtton: 13.03.2017 | Maŋimuš ođasmahttojuvvon: 15.03.2017
Nuorra vearredahkkiide gaskal 15 ja 18 jagi sáhttá leat buorre jus ráŋggáštuvvojit ja nu sáhttá čuovvolit sin veahkkedoaimmaiguin, boahtá ovdan Nordland-dutkama oasseraporttas dáid ortnegiid birra. Dát ráŋggáštusat galget leat molssaeaktun dasa ahte čohkkat giddagasas.
– Nuoraid ráŋggášteapmi ja nuoraid čuovvoleapmi leat doaimmat mat sáhttet “jorgalahttit” nuorra vearredahkkiid árabut dan ektui go biddjojuvvot giddagassii. Dat seastá olu servodaga ruđalaš ja olmmošlaš návccaid, lohká Justiisa- ja gearggusvuođaministtar Per-Willy Amundsen (OvB).
Ulbmil lea veahkehit nuoraid geat leat vearredaguid bargan šaddat lágalažžan čavga čuovvoleami bokte. Nuorat galget ee. oassálastit čoahkkimiidda gos áššái guoskevaš bealit ja skuvlla, mánáidsuodjalusa, politiija ja kriminálafuolahusa ovddasteaddjit galget leat fárus. Ráhkaduvvo nuoraidplána, mas galget leat sierranas doaimmat mat easttadit ođđa vearredaguid ja mat váikkuhit buori ovdáneami nuoraide. Ráŋggáštusaid čađaheapmi gullá konfliktaráđiide.
Nordland-dutkama oasseraporta čájeha ahte oallut nuorat leat ožžon buori veahki dán rádjái, muhto sáhttá gollat menddo guhkes áigi das go vearredahku bargojuvvo dassái go čuovvoleapmi álggahuvvo. Dalle lea stuorit várra čađahit ođđa vearredaguid. Dát lea ášši mainna departemeanta bargagoahtá.
– Dát gaskaraporta addá midjiide buori máhtu dan birra mot dat duohta dilis čađahuvvo. Dan mii atnit buorrin ásahit ja njulget doaimmaid nu ahte mii sáhttit veahkehit eanemus nuorra vearredahkkiid rievttes geainnuid nala, dadjá Amundsen.
105 nuora leat ožžon nuoraid ráŋggášteami ja 648 ožžon nuoraidčuovvoleami dan áigodagas go ortnet álggahuvvui, suoidnemánu 2014:s gitta 2016:i lohppii. Nordland-dutkama loahpparaporta galgá gárvvistuvvot 2018:s.