Eanet ruhta luonddudiehtojuohkimii ja hálddašeapmái

Birasgáhttendepartemeantta vuoruhansuorggit leat maid luonddudiehtojuohkin ja bagadallan. Ráđđehus árvala lasihit juolludemiid álbmotmeahcceguovddážiidda ja luonddudiehtoguovddážiidda 6,7 miljovnna kruvnnuin.

Ráđđehus háliida geavahit oktiibuot 43,7 miljovnna kruvnnu dáid doaimmaide. Ráđđehus áigu maid nannet suodjalanguovlluid hálddašeami. Danne lea árvaluvvon lasihit 14 miljovnna kruvnnu suodjalanguovlluid báikkálaš hálddašeapmái.

-Lea hirbmat buorre go mii dál beassat buoridit diehtojuohkima luonddu birra. Dát buorida olbmuid áddejumi dasa ahte manne lea nu dehálaš gáhttet min luonddu riggodagaid, cealká birasgáhttenministtar Bård Vegar Solhjell. Son lea maid ilus go mii dál beassat virgádit luonddumeahccehálddašeddjiid geat vel eai leat virgáduvvon. Dát nanusmahttá álbmotmehciid báikkálaš hálddašeami ja daid eará stuora suodjalanguovlluid.

Juolludus álbmotmeahcceguovddážiidda ja eará luonddudiehtoguovddážiidda lea árvaluvvon lasihuvvot golmmain miljovnna kruvnnuin nannet čájáhus- ja diehtojuohkindoaimmaid. Dat maid lea buorrin doaibmabijuide mat ovttastahttet hálddašeami, luonddudiehtojuohkima, luonddubagadallama, oahpisteami ja mátkeealáhusa.

Boraspireguovddážiidda lea árvaluvvon lasihit 3,7 miljovnna kruvnnu, oktiibuot 6,7 miljovnna kruvnnu dán doibmii. Boraspirehálddašeami dehálaš ulbmil lea unnidit giččuid. Danne galget ásahuvvot dohkkehuvvon boraspireguovddážat gaskkustit objektiivvalaš, fágalaš riekta ja ođasmahttojuvvon dieđuid ekologiija, hálddašeami ja giččuid birra mat gusket boraspirenáliide Norggas.