Ráđđehus joatká veahkehit sin geat rahčet eanemusat ássanviesumárkanis

- Ráđđehus áigu veahkehit sin geat eanemusat rahčet ássanviesumárkanis. Jagi 2012 joatkašuvvá ássandoarjja ortnet, álggahanloatna ja eará buorit ortnegat maid mii fállat Viessobáŋkku bokte. Ráđđehus vuoruha ássanviesusosiálalaš politihka, muitala gielda- ja guovloministtar Liv Signe Navarsete.

Viessobáŋkku strategalaš doaibma gielddaid ektui gos leat ássansosiálalaš hástalusat galgá jotkojuvvot jagi 2012.

Ássandoarjja lea dehálaš veahkehan dihtii sin geainna leat stuora ássangolut ja heajos sisaboahtu vai nákcejit máksit ássangoluid. Lea rehkenastojuvvon ahte jagi 2012 leat 128 000 olbmo geaidda juohkehažžii mákso sullii 25 000 kruvnnu sturrosaš doarjja.

Álggahanloatna lea buorre gaskaoapmi veahkehit nuoraid ja sin geat rahčet ásaheamis sierra ássanviesu. Álggahanloana jearru gielddain lea leamaš stuorit jagiid maŋŋil finánsaroasu go ovddit jagiid. Ráđđehus evttoha ahte Viessobáŋkku loatnarámma  jagi 2012 galgá leat 15 miljárdda kruvnnu. Álggahanloanas galgá bajimus prioritehta loatnarámma siskkobealde. Viessobáŋku juolluda maid vuođđoloana ođđa huksemiidda ja ássanviesu divodemiide ja loana mánáidgárddiide.

Ráđđehus evttoha maid sihkut sierragessosa jos leat stuora buozalmasgolut. Luvvejuvvon ruđat galget baicce geavahuvvot nannet dákkár ortnegiid, ja ruhtadoarjja ássanviesuide lasihuvvo 23 miljovnna kruvnnuin jagi 2012. Dát mearkkaša ahte eanet olbmot sáhttet orrut ruovttuin ovdal go fárret institušuvnnaide.

Gielddain galget gávdnot buorit láigoviesut veahkehan dihtii sin geat rahčet ássanviesumárkanis. Ráđđehus evttoha jagi 2012 lasihit doarjaga láigoviesuide 404,6 millijovnnas mii lei jagi 2011 430 millijovdnii. Dát dagaha sullii 1100 láigoviesu.  

Oažžun dihtii buriid bohtosiid ássanviesusosiálalaš barggus, de lea dárbbašlaš ahte gielddain lea doarvái buorre gelbbolašvuohta hástalusaid birra. 

Ássanviesusosiálalaš gealbodoarjja, maid Viessobáŋku hálddaša, lea dehálaš árvvosmahttit gealbobuorideami ja láhčit diliid gávdnan dihtii buriid ássanviesusosiálalaš čovdosiid. Jahkái 2012 evttoha ráđđehus 77 miljovnna sturrosaš  juolludusrámma, 7 miljovnna lassáneapmi jagi 2011 ektui.

Guovloovddideapmi lea dehálaš eastadit heajos eallindili ja váilevaš dikšumiid ássanviesuin ja olgoguovlluin. Áigodagas 2007 – 2010 lei guovloovddideapmi ollislaččat čadnon oktasaš stáhtalaš-gielddalaš vuoruheapmái Groruddalenis. Jagi 2011 rájes váldojuvvojedje maid hearkkes guovllut Bergenis mielde ja ožžo 3 miljovnna kruvnnu. Jagi 2012 evttohuvvo ahte guovloovddidandoarjja Bergenii lasihuvvo 6 miljovnna kruvdnui. Dasa lassin evttohuvvo ahte guovloovddideapmi gusto maiddái Troandimii ja juolludit 1,5 miljovnna kruvnnu. 40 miljovnna kruvnnu evttohuvvo juolludit doaibmabijuide Groruddalenis.

Gielda- ja guovludepartemeantta preassatelefovdna: 22 24 25 00.