Áigeguovdilis ja boahtteáigái heivehuvvon viessopolitihkka

- Norggas galget buohkat beassat ássat bures ja oadjebasat. Danne áigu ráđđehus jagi 2013 várret sullii 24 miljárdda kruvnnu ruhtaloatna- ja doarjjaortnegiidda mat geavahuvvojit iešguđetlágan viessohuksendoaimmaide ja ássandoarjagii, cealká gielda- ja guovloministtar Liv Signe Navarsete.

Viessobáŋkku loatnarámma jagi 2013 galgá leat 20 miljárdda kruvnnu. Ráđđehus maid árvala juolludit 2 970 miljovnna ássandoarjjaortnegii, vai sii geat leat heajos ruhtadilis ožžot ekonomalaš doarjaga ásahit sierra ássanviesu ja doalahit dan.

Dasa lassin várrejuvvojit ruđat čuovvovaš doaimmaide:

· Doarjja hukset sierra ássanviesu lasihuvvo 30 miljovnna kruvnnuin 354,3 miljovnna kruvdnui· Doarjja láigoviesuide lasihuvvo 58,6 miljovnna kruvnnuin 488,6 miljovnna kruvdnui· Doarjja ássanviesuid heiveheapmái lasihuvvo 47,5 miljovnna kruvnnuin 172,5 miljovnna kruvdnui

Go olmmošlohku lassána, de divrot viessohattit. Nuorain ja sis geain ii leat nu buorre ruhtadilli sáhttá šaddat hástaleaddjin ásaheamis sierra ássanviesu dakkár ássanviesumárkanis gos viessohattit leat divrasat.

-Álggahanloatna oktan ásahandoarjagiin soitet leat deháleamos váikkuhandoaimmat mat mis leat veahkehit nuoraid ja sin geat eanemusat rahčet ássanviesumárkanis. Dáid ruhtadoarjagiid bokte lea vejolaš hukset 1200 ođđa láigoviesu, dadjá Navarsete.

Stáhtaráđđi fuomášahttá ahte Norggas guhkku gaskamearálaš eallinahki ja boarrásat lassánit. Dát mielddisbuktá stuorit gáibádusaid ja hástalusaid beassat ássanviesumárkanii.

-Mun háliidan ahte mii boahtteáigái hukset buriid viesuid alla kvalitehtain. Viessobáŋkku vuođđoloatna váikkuha dasa ahte viessofálaldagat lassánit ja ahte huksejuvvojit birasseasti ássanviesut main lea buorre kvalitehta. Mii fertet maid veahkehit boarrásiid ja doaibmaváddjiid, vai sii sáhttet heivehit viesuideaset ja guhkit orrut ruovttus, lohká Navarsete.

Gielda- ja guovlodepartemeantta preassatelefovdna: 22 24 25 00.