Stouorradiggedieđáhus gonagasreappá hálddašeami birra

- Ráđđehusa bajimus ulbmil gonagasreappá hálddašeamis lea nu bures go vejolaš ráddjet gonagasreappá leavvama Norgga mearraguovlluide ja sihkkarastit ahte gonagasreabbámáddodat lea nu uhcci go vejolaš gávpeguovlluid olggobealde, dadjá guolástus- ja riddoministtar Helga Pedersen.  

Stuorradiggedieđáhusas gonagasreappá hálddašeami birra biddjojuvvo eanet deaddu (ovddalgihtii ráhkkaneami prinsihppa)dasa ahte uhcidit vára billisteames birrasa. Ráđđehus evttoha doaibmabijuid mat eastadit leavvama ja ođđa rájiid gávpebivdoguovllu várás. Evttohuvvo maiddái ahte eanebut besset searvat bivdui dainna lágiin ahte vuollel 11 mehtera guhkkosaš  fatnasiidda Nuorta-Finnmárkkus addojuvvo oppalaš lohpi searvat muddejuvvon bivdui gávpeguovllus. 

Ráddjejuvvon gávpeguovllu siskkobealde galgá ain leat muddejuvvon bivdu, muhto eanebut galget beassat searvat bivdui ja galgá beassat bivdit njiŋŋelasreappáid ja galgá leat lohpi váldit lassesállaša. 

- Ráđđehusa áigumuš lea maid seammás muddet gonagasreabbámáddodaga gávpebivdoguovllu siskkobealde dakkár vugiin mii láhčá bistevaš vuođu ealáhusdoaimmaide ja barggolašvuhtii gávpeguovllus, dadjá Pedersen. 

- Buot fatnasat mat otne besset searvat bivdui, galget ain beassat bivdit. Dan lassin galget vuollel 11 mehtera guhkkosaš fatnasat Nuorta-Finnmárkkus oažžut sierra lobi beassat guvlui. Dát sullii duppalasttášii muddejuvvon bivdoguovllu bivdofatnasiid logu, dadjá guolástus- ja riddoministtar. – Vaikke vel dát vuolidivččii ge daid fatnasiid dienasvuođu mat dál juo leat mielde bivddus, de mun jáhkán ahte olbmot geat ásset daid guovlluin maidda gonagasreabbá guoská eanemusat, dorjot eanet ja eanet dán muddema, dadjá guolástus- ja riddoministtar Helga Pedersen. 

- Guhká juo lea leamaš doarespolitihkalaš ovttamielalašvuohta das ahte maiddái sii, geaid gonagasreabbá lea givssidan, galget beassat ávkkástallat dáinna resurssain. Dát ii leat dattetge čađahuvvon geavadis. Dán mii fertet njulget, dadjá Helga Pedersen. 

Ráđđehusa doaibmabidjoevttohusa váldočuoggát leat: 

• Gávpeguovlu lea ráddjejuvvon oarjjás 26°N bokte nu mo dál, earret ođđa ráddjejumi Porsáŋgguvuona mátta guvlui. Danne ii gula ge Prosáŋgguvuona siskkit oassi šat gávpeguvlui. Ođas lea ahte guovlu ráddjejuvvo davás guvlui, lagabui mearriduvvon 26°N bokte linjá mielde 71°15’D rájes ja nuorttas guvlui territoriálaráji rádjai (12 nm vuođđolinjás), ja viidáseappot seammá go territoriálaradji Ruošša rádjái.
• Friija gonagasreabbábivdu ja gielddus luoitit daid fas merrii gávpeguovllus
• Árvvoštallat evttohusa ásahit foandda mii veahke luottahuhttit gonagasreappá gávpeguovllu siskkobealde
• Oččodit doarjjaortnega daid ealáhusdoaibmabijuid várás maid ulbmil lea ávkkástallat stuorát osiin máddodagas
• Ii galgga beassat šaddadit dahje biebmat gonagasreappáid ráddjejuvvon guovllu olggobealde
• Bivdit sihke varris- ja njiŋŋelasreappáid gávpeguovllu siskkobealde
• Bivdit vahágahttojuvvon reappáid oassin earis
• Váldit lassesállaša gávpeguovllu siskkobealde
• Áŋgiruššat dutkat earret eará leavvangažaldagaid, ekovuogádatváikkuhusaid, bioekonomalaš váikkuhusaid ja servodat- ja ealáhusekonomalaš diliid
• Leavvaneastadandoaibmabijuid ávki árvvoštallojuvvo jahkásaččat
• Gonagasreabbáhálddašeapmi árvvoštallojuvvo viđa jagi geahčen

Leaŋka dieđáhussii

Leaŋka ovdanbuktimii