Strategiijas ráđđehus deattuha ahte arvat máhttosuorggit fertejit nannejuvvot vai lea vejolaš ollašuhttit davveguovlopolitihka áigumušaid.

– Mis leat Norggas riikkaidgaskasaš dásis njunušdutkanbirrasat máŋgga suorggis mat gusket davveguovlluide, ja mii fertet válmmaštit buoremus dutkanbirrasiid miehtá riikka, vai sáhttit vuoitit daid máhttohástalusaid mat bohtet min ovddal davvin, cealká Djupedal.

Davveguovlostrategiija deattuha ahte máhttoáŋgiruššamat fertejit leat viidát ja guhkesáigásaš, muhto ráđđehus lea čujuhan muhtun surggiide mat leat deaŧalaččat davveguovlluid ovddi­deamis. Dain konkrehta fáttáin maid leat árvalan nannet, leat dálkkádat- ja buolladutkama máhtto­vuođđu, ja áhpeguovlluid ekovuogádaga vuhtiiváldi hálddašeapmi, mariidna dutkan, petroleum­dutkan ja áhpeguovlluide guoski servodatdieđalaš, juridihkalaš ja humanistalaš dutkan. Deaŧalaš suorggit leat maiddái álbmotdearvvašvuođadieđa ja máhttu das, mo biras­mirkkut čuhcet dearvvašvuhtii.

– Buollaguovlluid dálkkádatdutkan addá midjiide deaŧalaš dieđuid das mo biras- ja dálkkádatnuppástusat bohtet áigái. Dákko Norggas lea erenoamáš ovddasvástádus buollariikan, cealká stáhtaráđđi Djupedal. Mis leat buorit ovdehusat sáhttit lasihit oasimet máilmmi máhttoovdáneapmái, ee. Svalbárdda oahpahus- ja dutkanbirrasiid geažil. Ráđđehus lea juo dieđihan iežas bidjat stuorra návccaid buolladutkamii go Norga lea searvan Riikkaidgaskasaš Buollajahkái. Ráđđehus áigu láhčit dilálašvuođaid nu, ahte sihke norgalaš ja olgoriikkalaš dutkit geavahit Svalbárdda erenoamáš dutkanvejolaš­vuođaid ain buorebut boahttevaš jagiid.

Norgga dutkanráđis šaddá leat guovdilis rolla dutkansuorggi strategiija čuovvoleamis. Mealgadii buot departemeanttat stivrejit ruđaid davveguovlluide guoskevaš dutkamii Dutkanráđi olis. Dutkanráđđi galgá leat ráđđehusa reaidu mainna geahčada dáid ruđaid oktii­gullevašvuođa. Dutkanáŋgiruššan Barents 2020 šaddá leat deaŧalaš gaskaoapmi ođđa prošeavttaid álggaheapmái.

Davi máhttoinfrastruktuvra maid šaddá leat guovdilis fáddá strategiijas. Norgga bures huksejuvvon universitehta- ja allaskuvlavuogádat davvin maid šaddá mearkkašit ollu go ulbmilsuorgin lea davveguovlluid máhttobuorideapmi. – Váldohástalussan šaddá dat, go galgat buoridit oahpahus- ja dutkaninstitušuvnnaid ja ealáhusaid ovttasdoaibmama. Dákko fertejit dieđusge institušuvnnat ieža ja fitnodagat dahkat oasiset, cealká Djupedal.

Máhttosuorggi riikkaidgaskasaš ovttasbargu maid deattuhuvvo strategiija deaŧalaš suorgin. Ruošša lea guovdilis bargoguoibmi. Nu leat maiddái USA, Kánada ja EU-riikkat, lassin min davviriikkalaš ránnjáide. Sávahahtti lea maid vuođđudit lagat ovttasbarggu eará riikkai­guin, nugo Japánain, Indiain ja Kiinnáin. Norggas lea juo lagaš oahpahus- ja dutkanovttas­bargu Ruoššain máŋgga fidnosuorggis, ja Davvi-Norgga ja Davveoarje-Ruošša universi­tehtaid, allaskuvllaid ja skuvllaid gaskka.

Lenke til strategien

Lenke til mer informasjon om Nordområdestrategien