Ruošša atomafápmorusttegat – váikkuhusat Norgii

Stáhta suonjardandorvoguovddáža ođđa raporttas lea guorahallojuvvon movt stuora lihkohisvuohta Leningrada atomafápmorusttegis Ruoššas váikkuhivččii Norgii.  Guorahallan lea dahkkon Olgoriikadepartemeantta (OD) dáhtu mielde ja lea okta doaibmabidju  ráđđehusa  davviguovlluid atomafápmodoaimmaid ja birasáššiid doaibmaplánas.     

Guorahallamis boahtá ovdan ahte radioaktiivvalaš suođđama vejolašvuohta  katastrofalaš lihkohisvuođa geažil Leningrada atomafápmorusttegis St.Petersburgga guovllus lea mihá stuorit atomafápmorusttega njealji boares atomareáktoriin go ovttage daid ođđa reáktoriin mat dál huksejuvvojit. Iešguđetlágan árvvoštallojuvvon  lihkohisvuođagovahallamat čájehit,  ahte Tsjernobyl  sturrosaš lihkohisvuohta váikkuhivččii min oainnu mielde Norgii eanemus, jos bieggahálti jorggiha Norgga guvlui ja jos lea unnán njuoskkádat.  Duođaleamos lihkohisvuođagovahallan čájeha  ahte ollislaš radioaktiivvalaš atomasuođđan Norgii šattašii duppal geardde stuorit go Tsjernobyl-lihkohisvuođas. Dát guoská erenoamážit Romsii ja Finnmárkui.

 -Raportta bohtosat čájehit ahte vejolaš lihkohisvuohta Leningrada atomafápmorusttegis mielddis buvttášii stuorra váikkuhusaid maiddái Norgii. Ruošša eiseválddiiguin ovttas áigut mii danne joatkit sihkkarastit erenoamáš daid boares atomareáktoriid Leningrada guovllus,  cealká stáhtačálli Torgeir Larsen.

Norga lea juo mielde lágideamen bargiide hárjehallamiid ja bargá ovttas Leningrada atomafápmorusttega jođiheddjiiguin, Suomain ja Ruoŧain ovttas. Sihkkarvuohta Leningrada atomafápmorusttegis lea olu buorránan daid 15 maŋimuš jagiid, Ruošša iežas árjjálaš doaimmaid bokte ja oarjemáilmmi vehkiin.