Raporta sierragessosa birra stuora buohcangoluid dihte

Ruhtadandepartemeanta lea odne sádden gulaskuddamii raportta sierragessosiid birra vearrovuogádagas alla buohcangoluid dihte. Raportta lea departemeanttaidgaskasaš bargojoavku gárven ja lea kárten ja árvvoštallan dálá sierragessosa, ja árvvoštallan molssaevttolaš čovdosiid dálá ortnegii.
 
- Bargojoavku lea dahkan vuđolaš ja nana barggu dehálaš suorggis. Raporta addá ruhtadandepartementii buori vuođu viidáset árvvoštallamis dálá ortnega, dadjá stáhtačálli Schjerva.

Dálá njuolggadusaid mielde sáhttá vearromáksi geas ovtta jagis leat golut unnimusat 9 180 ruvnno ovddas buozalmasvuođa dahje eará bissovaš givssiid dihte, oažžut sierragessosa dávdagoluid ovddas go vearrogeatnegas bálká meroštallojuvvo. Dát sierrageasus ortnet stuora dávdagoluid dihte ii doaimma dohkálaččat, earret eará danin go eavttut oažžut gessosa leat eahpečielgasat ja sáhttet meroštallojuvvot. Sihke vearromáksit ja vearroeiseválddit gaskkas lea stuora eahpesihkarvuohta das makkár goluid ovddas sáhttá oažžut sierragessosa, ja movt golot galget duođaštuvvot. Dasa lassin ortnet dagaha mealgadis hálddahuslaš váttisvuođaid.

Ruhtadandepartemeanta ásahii 2009 ođđajagimánus departemeanttaidgaskasaš bargojoavkku mii dál lea kárten ja árvvoštallan dálá ortnega. Bargojoavku lea árvvoštallan juogo heaittihit sierrageasus ortnega dahje buorideames ortnega.

Bargojoavkku eanetlohku oaivvilda ahte buoremus čoavddus lea heaittihit sierragessosa vearrovuogádagas, ja ahte dat ruđat mat dál geavahuvvojit vearrogeahpádussii, baicca galget atnot nannemis almmolaš doarjjaortnegiid mat ollašuhttet seamma  ulbmiliid go sierrageasusortnet, dahje muđui dearvvašvuođaulbmiliidda maid muđui háliidat vuoruhit. Unnitlohku ii daja maidege dasa ahte galgá go sierrageasusortnet heaittihuvvot vai bisuhuvvot, ja dadjet ahte dat árvvoštallan berre dahkkot politihkalaš mearridanproseassas.