IMF giitá Norgga loatnafálaldaga ovddas

Riikkaidgaskasaš valuhttafoanda, IMF, sáddii otne preassadieđáhusa gos hálddahusa direktevra Christine Lagarde giitá Norgga loatnafálaldaga ovddas. Norga lea fállan gitta 6 mrd. SDR, sullii 53 mrd. kruvnnu, sturrosaš loana Riikkaidgaskasaš valuhttafondii (IMF).

Norgga loatnafálaldat eaktuda stuorit riikkaidgaskasaš searvama nannet IMF loatnajuolludanvuoimmi. Olu riikkat leat dál álggahišgoahtán iežaset doaimmaid. Ruhtadanministtar Sigbjørn Johnsen vuolgá dán vahkus Washington DC:ii oassálastit IMF giđđačoahkkimiin, gos dát ášši lea áššelistus.

-Viiddis riikkaidgaskasaš ovttamielalašvuohta nannet IMF loatnajuolludanvuoimmi lea olámuttos. Mun doaivvun dát lea sajis moatti beaivvi geažis. Lea lunddolaš ahte Norga veahkeha. Mis lea stuorra beroštupmi dasa ahte bisuhit stargadis riikkaidgaskasaš ekonomiija ja ruhtadili, ja ahte gávdnojit doarvái riikkaidgaskasaš hearbevárit, cealká ruhtadanministtar Sigbjørn Johnsen.

-Arvat olu Norgga lagaš gávpe- ja ovttasbargoguoimmit vásihit dál váttis ekonomalaš dili. Bargguhisvuohta lea allat olu riikkain, erenoamáš nuoraid gaskkas. Lea dehálaš áŋgiruššat viidát juksan dihtii ovdáneami ja barggolašvuođa, dadjala Johnsen.

Eanet IMF loanaid birra

Ruhtadanministtar Sigbjørn Johnsen sáddii juovlamánu 21.beaivve 2011 čállosa IMF hálddahusa direktevrii Christine Lagarde:ii gos organisašuvdnii fállojuvvui 6 mrd. SDR bilaterála loatnašiehtadusa bokte, man eaktun lea Stuoradikki dohkkeheapmi. Supmi vástida sullii 53 miljárdda kruvnnu otná valuhttakurssa mielde. Dát mielddis buktá ahte Norgga ollislaš loatnarámma IMF:ii dalle lassána duppalin.

Norgga loatnaruđaid sáhttá de IMF háldet dábálaš loatnadoaimmaide. Ruđat eai leat várrejuvvon sierra guovlluide dahje riikkaide, muhto galget olámuttos buot IMF miellahtturiikkaide.

Fálaldat lea bilaterála loatnašiehtadus maid IMF sáhttá háldet guhkit áiggi ja dárbbu mielde. Juohke loana mielde čuovvu sierra máksinplána. IMF loatnasihkkarvuohta lea hirbmat buorre. Lea presedeansa ahte IMF oažžu gáibádusaidis máksojuvvot ruovttoluotta ovdal eará velgoheddjiid. IMF 187 riikka vástidit dasa lassin ovttaráđálaččat bilaterála loanaid ruovttoluotta mávssuid,dan maid Norga dál fállá. Vuoitu loanaid ovddas vuollel loatnarámma lea SDR-reantu. Dat lea veardiduvvon amerihkálaš dollára, euro, brihttalaš pundda ja japánalaš yen oanehisáiggi stáhtabábirreanttu ektui.

Loga maiddái:

IMF preassadieđáhusa
Ruhtadanministera Johnsen reive IMF-direktevrii Lagarde
Reive IMF-direktevrras Christine Lagarde