Aktiver Javascript i din nettleser for en bedre opplevelse på regjeringen.no

Historjjálaš arkiiva

Suoidnemánu 22.beaivve-kommišuvdna:

- Dehálaš oahppat vai sáhttá buoridit boahtteáiggi gearggusvuođa

Historjjálaš arkiiva

Almmustahttináigodat Regjeringen Stoltenberg II

Almmustahtti: Stáhtaministara kantuvra

-Ráđđehus lea otne nammadan suoidnemánu 22.beaivve-kommišuvnna mii galgá čađahit sorjjasmeahttun ja viiddis guorahallama ja árvvoštallama oahppan dihtii ráđđehusviesu ja Utøya terrorfallehemiin.

-Ráđđehus lea otne nammadan suoidnemánu 22.beaivve-kommišuvnna mii galgá čađahit sorjjasmeahttun ja viiddis guorahallama ja árvvoštallama oahppan dihtii ráđđehusviesu ja Utøya terrorfallehemiin.  Ulbmil lea ahte Norgga álbmot galgá nu bures go vejolaš ráhkkanan dustet ja heađuštit vejolaš terrorfallehemiid boahtteáiggis, ja seammás gáhttet guovddáš árvvuid Norgga servodagas nugo rabasvuođa ja demokratiija, lohká stáhtaministtar Jens Stoltenberg.

-Dát lea daid ulbmiliid mielde maid mii ja buot Norgga politihkkárat almmuheimmet suoidnemánu 27.beaivve.  Kommišuvnna mandáhta ja čoahkkádus lea hábmejuvvon ovttasráđiid Stuoradikki bellodagaiguin.  Mii leat váldán vuhtii Stuoradikki bellodagaid oainnuid ja árvalusaid. Lean ilus go  Olgešbellodaga, Kristtalaš álbmotbellodaga ja Gurutbellodaga njunnošat dorjot árvalusa. Ovddádusbellodat lea prinsihpalaččat mearridan árvalusa váldit vuhtii diehtun, muitala Stoltenberg.

Suoidnemánu 22.beaivve-kommišuvnna mandáhtas boahtá ovdan ahte kommišuvdna galgá guorahallat servodaga ja eiseválddiid návccaid nugo:

  • Fuomášit fallehanplánaid ja caggat terrorfallehemiid
  • Suodjalit fallehemiid vuostá ja unnidit váikkuhusaid fallehemiin
  • Hálddašit dili terrorfallehemiid vuolde ja maŋŋil, nugo vára váldit gillájeddjiid ja oapmahaččaid. Kommišuvdna ferte maid váldit vuhtii ahte gillájeddjiid gaskkas ledje olu nuorat

-Kommišuvdna galgá árvalit doaibmabijuid maid sii oidnet dárbbašlažžan buoridit boahttevaš gearggusvuođa.  Kommišuvnnas lea friddjavuohta árvvoštallat eará beliid ja doaimmaid jos guorahallan čájeha dan dárbbašlažžan, cealká Stoltenberg. 

Sorjjasmeahttun kommišuvdna
Kommišuvdna galgá bargat beroškeahttá ráđđehusas ja Stáhtaministara kantuvrras. Dat loahpaha iežas barggu borgemánu 10.beaivve 2012 ja raporta galgá geigejuvvot stáhtaministarii.  Kommišuvnnas lea friddjavuohta viežžat gealbbu earáin jos dasa lea dárbu, ja ásahit alcces sierra čállingotti. Lea deattuhuvvon čohkket olbmuid kommišuvdnii geain lea iešguđetlágan fágalaš gelbbolašvuohta.

Alexandra Bech Gjørv galgá kommišuvnna jođihit.  Son lea jurista ja bargá advokáhttan advokáhttafitnodagas Hjort.  Bech Gjørv lea guhká bargan ealáhuseallima jođiheaddjin.  Sus lea viiddis jođihanhárjáneapmi, ee. lea son leamaš Norsk Hydro fitnodatdirektevra.  Su ovddasvástádus lei bargoveahka, dearvvašvuohta, biras ja sihkkarvuohta ja sus lei servodatovddasvástádus ovtta Norgga stuorimus fitnodagas. Dasa lassin lea son leamaš Ny Energi doaimmahaga direktevra sihke  Hydros ja Statoilas.  Bech Gjørvas lea maid viiddis internašunála duogáš.

Kommišuvnna eará miellahtut:

  • Hordaland ovddeš politiijameašttir, Ragnar Line Auglend, Bergen
  • Ovddeš politiijadirektevra Københámmanis, Hanne Bech Hansen, Hillerup, Danmárku
  • Dutki Laila Bokhari, Oslo
  • Ovddeš NSB fitnodathoavda Einar Enger, Rakkestad
  • Generalleutnánta Torgeir Hagen, ovddeš hoavda Suodjalusa vákšunbálvalusas, Hamar
  • Professor Guri Hjeltnes, Oslo
  • Rukses Ruossa Sadjásašpresideanta, Linda Motrøen Paulsen, Stavanger
  • Fylkkadoavttir Karin Straume, Čáhcesuolu

Dán ovcci olbmo lassin lasihuvvo kommišuvdnii vel okta almmáiolmmoš. Sus galgá politiija/gearggusvuođafágalaš gelbbolašvuohta muhtun min lagamus ránnjáriikkain.

Bajás