Bonusčuoggáid čohkken šaddá lobálaš sisriikka girdiruvttuin

Ráđđehus lea otne mearridan heaittihit jagi 2007 láhkaásahusa mii gieldá bonusprográmma sisriikka girdijohtolagas.

- 11 jagi bonusčuoggáid čohkkengielddus lea doaibman. Bonusčuoggáid čohkkengielddus lea leamaš dehálaš sihkkarastimis dan ahte eanet go okta girdivuođđudus ásahuvvo Norgii, ja lea bisuhan gilvvu girdijohtolagas, cealká ođasmahttin-, hálddahus- ja girkoministtar Rigmor Aasrud.

Ráđđehusas lea seamma ballu go Gilvobearráigeahčusge girdijohtolaga gilvvu geažil, erenoamážit boaittobealeguovlluin, go bonusčuoggáid čohkkengielddus heaittihuvvo. Muhto dál leat guokte stuora aktevrra norgga girdimárkanis, ja gilvodilli lea nannoseabbo dál go dalle go láhkaásahus doaibmagođii jagi 2007.

Gilvobearráigeahčču áigu ain dárkilit čuovvut mielde girdijohtolatmárkanis. Gilvobearráigeahčču bivdojuvvo árvvoštallat galgá go girdivuođđudusaid geatnegahttit almmuhit bonus-prográmmaid geavaheami. Fámu boasttugeavaheami gielddus ja Gilvobearráigeahču váldi dutkat ja gáibidit dieđuid addá Gilvobearráigehččui bargoneavvuid sihkkarastit ahte girdivuođđudusat eai geahččal geavahit bonusprográmma dainna lágiin ahte dat billista gilvaleami.  

- Ráđđehus oaivvilda danne ahte dál lea rivttes áigi heaittihit bonusgildosa ja geavahišgoahtit  dábálaš gaskaomiid gilvolága njuolggadusaid mielde. Mii áigut ođđasit árvvoštallat váikkuhangaskaomiid jos márkandilli dan gáibida. Ráđđehus ii doarjjo ESA rievttálaš árvvoštallamiid ahte bonusgielddus rihkku EEO-soahpamuša, dadjá Rigmor Aasrud.

Ráđđehus áigu guorahallat vejolašvuođaid lága bokte mearridit ahte bonusčuoggát mat čohkkejuvvojit bargodili oktavuođas galget addot sutnje gii máksá mátki ovddas, namalassii bargoaddái. Ulbmil dákkár guorahallamiin lea iskat vejolašvuođaid geahpedit hálddahuslaš noađi giehtaguššat vearrogeatnegasvuođaid mat gusket bonusčuoggáid priváhta geavaheapmái mat leat čohkkejuvvon virgemátkkiin ja vejolaš negatiivva gilvováikkuhusaid láhkaásahusa heaittiheami oktavuođas.