Gaskaboddosaš láhka mii guoská ássanviesuid ja astoáiggeviesuid viessosadjeláiggu guhkidanvuoigatvuhtii

Ráđđehus árvala dál gaskaboddosaš lága čielggadit riektedili dassážii go EOD cealká loahpalaš duomu dan nu gohčoduvvon viessosadjeáššis ja vejolaš viessosadjeláigolága rievdadusat leat čađahuvvon.

Eurohpá olmmošvuoigatvuođaduopmostuollu (EOD) celkkii geassemánu 12.b. 2012 duomu viessosadjeláigoáššis. EOD mearridii ahte vuoigatvuohta gáibidit eanaláigoguhkideami ovddeš eavttuid vuođul go viessosaji láigoáigi lea vássán, vrd. Viessosadjeláigolága § 33, lea Eurohpá olmmošvuoigatvuođakonvenšuvnna (EOK) vuosttas lassiprotokolla 1. artihkkala vuostá. Ráđđehus ávžžuhii čakčamánu 11.beaivve duomu fievrriduvvot EOD stuorakámmárii.

EOD duopmu lea mielddisbuktán eahpesihkkarvuođa makkár regelat dál gustojit guhkidanvuoigatvuođa ektui. Danne lea ráđđehus ovddidan gaskaboddosaš láhkaárvalusa mii guoská ássanviesuid ja astoáiggeviesuid viessosadjeláiggu guhkidanvuoigatvuhtii. Árvalus mielddisbuktá ahte vuoigatvuohta guhkidit láiggu seamma eavttuid vuođul go ovdal joatkkašuvvá viissis mearriduvvon áiggi dassá go vejolaš viessosadjeláigoláhka rievdadusat fápmuduvvojit. Viessosadjeášši loahpalaš meannudeapmi lea mearrideaddjin dasa ahte lea go dárbu rievdadit viessosadjeláigolága guhkidanvuoigatvuođa regeliid. Ain lea vuos eahpesihkkar goas loahpalaš riektečielggadeapmi dahkko. Ráđđehus árvala gaskaboddosaš lága gustot suoidnemánu 1.beaivve 2014 rádjai.

Gaskaboddosaš lágas árvaluvvo ahte ássan- ja astoáiggeviesuid láigolaččat sáhttet go láigoáigi lea vássán gáibidit viessosadjeláiggu guhkiduvvot gustojeaddji eavttuid vuođul, dassá go vejolaš viessosadjeláigolága guhkidanrievdadusat fápmuduvvojit. Viessosadjeláigguide mat juo leat guhkiduvvon viessosadjeláigolága § 33 mielde, gustojit seammá eavttut go ovdal dassá go vejolaš viessosadjeláigolága rievdadusat fápmuduvvojit. Dasto sisttisdoallá láhkaárvalus regela ahte dan rájes go gaskaboddosaš láhka fápmuduvvo, de lea dušše vejolaš dahkat geatnegahtti láigošiehtadusa dassá go vejolaš viessosadjeláigolága regelat guhkideami birra leat rievdaduvvon ja fápmuduvvon.