Nannejuvvon gearggusvuohta Svalbárddas

Ođđa helikopterhálla lea dehálaš oassin dán jagáš Svalbárda bušeahta evttohusas.– Mii áigut gádjunbálvalusa dahkat nannoseabbon, addit buoret responsaáiggi ja sihkkarastit gádjunveagaide eanet sihkarvuođa muni, dadjá justiisa- ja gearggusvuođaministtar Grete Faremo. Dát lea maiddái oassin Ráđđehusa davviguovllu vuoruheamis.

Ođđa helikopterhálla
Svalbárdda gádjunbálvalusa nannema várás galget 2014 rájes láigohuvvot guokte stuora ovttaárvosaš helikoptera. Dál lea Áššeolbmás okta stuora ja okta gaskastuora helikopter. Ođastuvvon našunálabušeahtas juolluduvvui 14 miljovnna ruvdno álggahit vuođđobargguid ođđa hálliin. Ráđđehus evttoha dál juolludit ruđaid helikopterháŋgárdda huksemii (fálagilvvu geažil ii almmuhuvvo konkrehta submi). Dát čuovvu St.dieđ.nr.22 Svalbárdda birra mas ovdanboahtá ahte Longyearbyen šaddá deháleabbon gádjun- ja gearggusvuođabásan Arktisas.

Alla birasmihtut Svalbárddas
Diibmá álggahuvvui golmma jagáš prošeakta hukset ráidnenrusttega Longyearbyen koallafápmorusttegii. Ráidnenrusttet lea meroštallon máksit 73,1 miljovnna ruvnno. 2013 bušeahttaevttohus lea 30 miljovnna ruvnno. Ráidnenrusttet plánejuvvo leat gárvvistuvvon 2014:s ja dat boahtá dalle deavdit Dálkkádat- ja nuoskkidandirektoráhtta ráidnengáibádusaid.  

Bargofanas
Áššeolbmá bargofanas lea maiddái dehálaš resursa gádjun- ja gearggusvuođa oktavuođas. Dasalassin fanas lea áibbas mearrideaddjin Áššeolbmá váldečađaheapmái dán sullos. Dálá fanasláigošiehtadus nohká 2013:s ja lea dárbu soahpat ođđa šiehtadusa bargofatnasa láigomáksui. Ráđđehus evttoha danin ahte Justiisa- ja gearggusvuođadepartemeanta 2013:s sáhttá dahkat ođđa šiehtadusa mii doaibmagoahtá 2014 rájes.

Heahtedieđiheapmi
Heahtedieđihanvuogádaga COSPAS-SARSAT ođasmahttin addá beaktileappot gádjunbálvalusa go heahtesignálat dárkilet almmuhit makkár posišuvnnas heahtedieđiheaddji lea ja buktá jođánet gaskkusteami Davvi-Norgga Váldogádjunguovddážii. Dát maiddái boahtá addit váikkuhusaid Svalbárdii ja áhpeguovlluide mat leat dan lahkosis.