Historjjálaš arkiiva

Ođđa doaimmat dan váste ahte hehttet terrora ja organiserejuvvon kriminalitehta

Historjjálaš arkiiva

Almmustahttináigodat Regjeringen Stoltenberg II

Almmustahtti: Justis- ja politidepartemeanta

Ráđđehus evttoha máŋga láhkarievdadusa suddjen dihte servodaga ja nannen dihte ovttaskasolbmo sihkarvuođa. Galgá šaddat ráŋggáštahtti ráhkkanahttit terrordaguid, vuostáiváldit terrorhárjehallama ja aktiivvalaččat oassálastit terrororganisašuvnnain.

Ráđđehus evttoha máŋga láhkarievdadusa suddjen dihte servodaga ja nannen dihte ovttaskasolbmo sihkarvuođa. Galgá šaddat ráŋggáštahtti ráhkkanahttit terrordaguid, vuostáiváldit terrorhárjehallama ja aktiivvalaččat oassálastit terrororganisašuvnnain.

– Mii áigut čavget terrorlága vai politiijat buorebut nagodit hehttet ja vuosttildit soloterrorisma, dadjá justiisa- ja gearggusvuođaministtar Grete Faremo. Dát lea oassin suoidnemánu 22.b.-kommišuvnna čuovvoleamis.

Ráđđehus evttoha gildosa terrordaguid ráhkkanemiid vuostá. Mearrádussii gustojit maiddái ráhkkaneamit maid okto lea dahkan, nu gohčoduvvon solo terrorisma.

– Otná áittagovva čájeha ahte terrora sáhttá doaimmahit ollu iešguđet lágiid mielde. Evttohus váldá vuhtii dán go dát siskkilda buot lágan terrorráhkkanemiid. Mearrideaddjin ráŋggáštuvvomii boahtá leat dat man guhkás bahádahkki lea ollen ráhkkanemiiguin, iige dat makkár ávdnasat leat geavahuvvon, dadjá Faremo.

Ráŋggáštahtti oassálastit terrorhárjehallamii
Dat gii vuostáiváldá metoda ja teknihka oahpahusa dan váste ahte dahkat terrordaguid, galgá sáhttit ráŋggáštuvvot. Odne dat gusto dušše dasa gii addá dakkár oahpahusa.

– Dát boahtá siskkildit sin geat oassálastet hárjehallanleairraide gos addojuvvo terroroahpahus. Evttohus siskkilda maiddái lobálaš oahpahusa, nugo ovdamearkka dihte bivdogeahččalankurssa, jus sáhttá duođaštuvvot ahte guoskevaš olmmoš lea mearridan terrordaguide geavahit gelbbolašvuođa, dadjá Faremo.  

Ráŋggáštahtti aktiivvalaččat oassálastit terrororganisašuvnnain
Ráđđehus evttoha kriminaliseret oassálastima terrororganisašuvnnain. – Terrorisma lea globála áittan demokratiijii ja ráfálaš ovttasdoaibmamii. Norgga láhkamearrádusat fertejit speadjalastit dan, dadjá Faremo.

Earret Taliban ja Al-Qaida, boahtá leat norgga duopmostuoluid hálddus mearridit makkár organisašuvnnat leat terrororganisašuvnnat. Ii šatta leat ráŋggáštahtti dat go dušše lea terrororganisašuvnnas miellahttun. Dalle gáibiduvvo aktiiva oassálastin.

Viiddiduvvon ráŋggáštusovddasvástádus go lea dahkamuš vearjjuiguin ja bávkkanasaiguin
Ráđđehus áigu viiddidit mearrádusa nu ahte šaddá ráŋggáštahtti jus lea dahkamuš osiiguin, dávviriiguin dahje eará ávdnasiiguin mat sáhttet adnot dasa ahte ráhkadit dahje geavahit báhčinvearjjuid ja bávkkanasaid. Danin boahtá dát maiddái siskkildit dahkamuša   bávkkanasoasážiiguin. 

Viiddiduvvon ráŋggáštusovddasvástádus organiserejuvvon kriminalitehta ovddas
Nu gohčoduvvon «máfiaparagráfa» viiddiduvvo nu ahte lea eambbo heivvolaš geavahuvvot luvvoset joavkkuide ja fierpmádagaide. Mearrádus galgá eambbo siskkildit dan maid odne oidnet leat organiserejuvvon vearredahkun, dat mearkkaša smávva ja stuora joavkkut, fierpmádagat ja iešguđetge organisašuvdnamállet, dan hui garra hierarkiijalačča rájes, gos lea čielga jođiheaddji ja daid luovos struktuvrraide gos ii leat čielga, bistevaš jođiheaddji.  

30 jagi ráŋggáštusrámma
Ráđđehus evttoha ásahit 30 jagi ráŋggáštusrámma roavva terrordaguide. Lohpi vuolggahit ráŋggáštusášši ii galgga áiggehuvvat. Dubmejuvvon giddagasráŋggáštus roavva terrordaguid ovddas ii galgga áiggehuvvat. 

Ođđa njuolggadusat sihkarvuođaáššiid meannudeapmái
Ráđđehus lea aitto evttohan rievdadusaid olgoriikkalašlágas váikkuhan dihte dasa ahte riikkas sáhttá bidjat olggos olbmuid geat leat áittan Norgga sihkarvuhtii, seammás go riektesihkarvuohta áimmahuššojuvvo. Odne ii leat lohpi bidjat ovdan sihkarvuođagraderejuvvon dieđuid duopmostuoluide áššiin mat gusket vuđolaš našunála beroštumiide dahje main leat olgoriikapolitihkalaš beroštumit, nu ahte ii almmostahte dieđuid olgoriikkalažžii ja su advokáhttii. Ráđđehus háliida ahte nammaduvvo sierra advokáhtta gii lea sihkarvuođadohkkehuvvon, ja gii galgá áimmahuššat olgoriikkalačča beroštumiid, nu ahte šaddá vejolašvuohta ovdanbidjat dakkár dieđuid duopmostuoluide.