Evttoha eambbo sorjjasmeahttun Mediabearráigeahču

Ráđđehus ovddida odne árvalusa Stuorradiggái mii addá Mediabearráigehččui eambbo sorjjasmeahttunvuođa Kulturdepartemeanttas. Evttohusa oassin ásahuvvo sierra  nammagoddi mii galgá mearridit váidalusaid mat čájehit duhtameahttunvuođa Kringkastingráđđái.

- Mediaid okta deháleamos doaibmamušain lea gozihit mo almmolaš eiseválddit geavahit fámu. Danne lea dehálaš ahte bearráigehččui sihkkarastojuvvo stuorra sorjjasmeahttunvuohta politihkalaš eiseválddiin. Sihke prinsihpalaš ja hálddahuslaš deastagat orrot doarjumin dán evttohusa, cealká kulturministtar Anniken Huitfeldt.

Láhkaevttohus mielddisbuktá ahte:

• Kulturdepartemeanta ii galgga šat meannudit duhtameahttunvuođa váidagiid Mediabearráigeahču mearrádusaide áibmomedialága vuođul (muhto dat ii guoskka riikkaviidosaš konsešuvnnaid bearráigehččui). 
• Sorjjasmeahttun váiddanammagoddi galgá meannudit váidalusaid.
• Departemeanta ii beasa šat stivret Mediabearráigeahču bođuáššiin dahje rievdadit mearrádusaid.
• Sihkkarastin dihtii ahte bearráigeahččoeiseváldi gozihuvvo leagitiibma láhkai, galgá Gonagas stáhtaráđis sáhttit nuppástuhttit bearráigeahču dahje váiddanammagotti mearrádusaid prinsihpalaš áššiin dahje áššiin mat leat hui dehálaččat servodahkii.

Kulturdepartemeanta eaiggáduššá NRKa ja mearrida váiddaáššiid mat sáhttet guoskat NRKii. Go dákkár áššit meannuduvvojit váiddanammagottis, de addá dat váiddameannudeapmái stuorát legitimitehta.

Jus evttohus mearriduvvo, de šaddá bargu juogaduvvot buorebut departementii ja bearráigehččui. Dalle oažžu Norga dakkár bearráigeahččovuogádaga mii muđuid lea dábálaš Eurohpás.

Evttohusat dorjojuvvojedje viidát gulaskuddamis.