Aktiver Javascript i din nettleser for en bedre opplevelse på regjeringen.no

Historjjálaš arkiiva

Preassadoarjja nuppástuvvo mediadoarjjan

Historjjálaš arkiiva

Almmustahttináigodat Regjeringen Stoltenberg II

Almmustahtti: Kulturdepartemeanta

Ráđđehus árvala beaiveaviissaid buvttadandoarjaga (preassadoarjja) nuppástuhttit vealatkeahtes ortnegin. Árvalus mearkkaša ahte doarjjaortnet ii guoskka šat dušše bábiraviissaide, ja ahte doarjjavuostáiváldit ožžot doarjaga maiddái digitála almmuhemiide.

Kulturminister Anniken Huitfeldt 
Kulturministtar Anniken Huitfeldt (Govva: Kulturdepartemeanta/Wenche Stadven Nybo)

Ráđđehus árvala beaiveaviissaid buvttadandoarjaga (preassadoarjja) nuppástuhttit vealatkeahtes ortnegin. Árvalus mearkkaša ahte doarjjaortnet ii guoskka šat dušše bábiraviissaide, ja ahte doarjjavuostáiváldit ožžot doarjaga maiddái digitála almmuhemiide. 

-Mii oaivvildat ahte lea dárbu ođasmahttit otná preassadoarjaga, cealká kulturministtar Anniken Huitfeldt.

-Aviissat mat dál ožžot buvttadandoarjaga vuoittahallet go lohkkit válljejit neahttaaviissa  bábiráviissa sadjái.  Mii vásihat ahte bábirvuđot doarjjaortnet hehtte digitála rusttegiid ođasteami ja ovddideami doarjjavuostáiváldi ásahusain. Dakkár áiggis gos aviisabuvttadeapmi njiedjá ferte mis sajis mediadoarjja mii láhčá dilálašvuođaid dása.  Nanu ja boahtteáigásaš vealatkeahtes doarjjaortnet movttiidahtášii ovddidit ođđa digitála bálvalusaid, dadjá kulturministtar Huitfeldt.

Árvalus rievdadit beaiveaviissaid buvttadandoarjaga lea oassi Slettholm-lávdegotti NOU 2010:14 Lett å komme til orde, vanskelig å bli hørt – en moderne mediestøtte čielggadeami čuovvoleamis.     

Dálá buvttadandoarjja beaiveaviissaide lea bábirvuđot doarjjaortnet oaivvilduvvon dakkár aviissaide mat rahčet ekonomalaččat ja mainna deaddilanlohku lea vuollin. Ortnet lea álggahuvvon nu áigá go 1960-logus. Preassadoarjja lea leamaš ulbmillaš ja beaktilis gaskaoapmin mediavalljodaga  ovddideamis Norggas.

Bajás