Gulaskuddanreive

 

Gulaskuddanásahusat, gč mieldduslistta

 

 

 

 

Deres ref

Vår ref

Dato

 

2007/04536 ME/ME2 LaB:elt

12.02.2008

 

Gulaskuddan – rievdadanevttohusat láhkaásahussii sámi aviissaid doarjagiid birra

Kultur- ja girkodepartemeanta bidjá dás ovdan evttohuvvon rievdadusaid njukčamánu 17. beaivvi 1997 mannosaš láhkaásahussii nr 248 sámi aviissaid doarjagiid birra. Gulaskuddančálus lea maiddái biddjojuvvon Internehttii, geahča  https://www.regjeringen.no/kkd

Departemeanta bivdá gulaskuddanásahusaid árvvoštallat galgá go čálus ovddiduvvot vejolaš vuolit orgánaide. Orgánat ja earát geat eai leat logahallanlisttas, sáhttet maiddái addit gulaskuddancealkámuša.

Kultur- ja girkodepartemeanta dáhttu vejolaš mearkkašumiid oažžut maŋimusat njukčamánu 26. beaivvi 2008.

Vi bivdit ahte vejolaš gulaskuddancealkámušat sáddejuvvojit sihke čálalaččat ja elektrovnnalaččat dán e-poastačujuhussii postmottak@kkd.dep.no.

Duogáš ja dálá ortnet

St.proposišuvnnas nr. 1 (2007-2008) dadjá Kultur- ja girkodepartemeanta ahte rámmalassáneapmi poasttas 75 ”Doarjagat sámi aviissaide” ja mearrádus ovttastit Áššu ja Min Áiggi mielddisbuktá ahte lea ”...dárbu ođđasit árvvoštallat sámi aviissaid preassadoarjjaortnega”.

Gustojeaddji láhkaásahusa paragráfa 6 vuođul dahká departemeanta jahkásaččat juolludusa váldojuolgadeami buvttadusdoarjjan, julevsámi siidduid doarjjan (ráddjejuvvon bajás 1 % rádjai juollususas) ja vejolaš várrejuvvon doarjjan.

Buvttadusdoarjja lea juhkkojuvvon vuođđodoarjjan mii lea ovtta stuoris buot ortnegii guoski aviissaide ja rievddaldeaddji doarjjan mii juhkkojuvvo dán mielde: aviissa buvttaduvvon almmuhanlohku geardduhuvvon aviissa buvttaduvvon sámegiel teavsttaid siidologuin. Vuođđodoarjja dahká 90 % buvttadusdoarjagis. Golbma aviissa ožžo buvttadusdoarjaga 2007, Áššu oaččui 4.6 milj. ruvnno, Min Áigi oaččui 4.7 milj. ruvnno ja Ságat fas oaččui 4.1 milj. ruvnno.

Dan lassin oaččui Lokalavisa Nordsalten 138.770 ruvnno julevsámegielat siidduid buvttadeapmái ja Nuorttanaste oaččui 250.000 ruvdnosaš várrejuvvon doarjaga.

Doarjjamálle evttohus

Doarjjamálle berre departemeantta árvvoštallama mielde erenoamážit fuolahit guokte ášši:

·       Ortnet berre leat einnostuhtti aviissaide. Danne evttoha ge departemeanta doalahit dan ortnega ahte doarjaga ávldooassi juhkkojuvvo vuođđodoarjjan mii lea ovtta stuoris buot ortnega aviissaide. 

·       Ortnet berre speadjalastit ahte aviisabuvttadeapmi sámegillii lea divraset go dárogiel aviissaid buvttadeapmi ja ahte sámegielat aviissat lea mielde bisuheamen ja ovddideamen sámegielaid.

Danne evttoha ge Kultur- ja girkodepartemeanta čuovvovaš málle:

1.    Buvttadusdoarjja juogaduvvo 85 proseanttain vuođđodoarjjan ja 15 proseanttain rievddaldeaddji doarjjan. 

2.    2008 ja 2009 sirdásanortnegin juhkkojuvvo vuođđodoarjja guoktin ovttasturrosaš oassin main nubbi galgá geavahuvvot aviisabuvttadeapmái sámegillii ja nubbi fas galgá geavahuvvot aviisabuvttadeapmái dárogillii.

3.    Rievddaldeaddji doarjja addojuvvo, nu mo dál ge, dušše sámegielat aviisasiidduid buvttadeapmái. 

4.    Dál rahppojuvvo vejolašvuohta ohcat doarjaga máttasámegielat aviisasiidduid buvttadeapmái, dan dálá ortnega málle man mielde mii addit doarjaga julevsámegielat siidduid buvttadeapmái ge. Doarjjavárrejupmi julevsámegillii ja máttasámegillii ráddjejuvvo buohkanassii 2 proseantta sturrosažžan poastta juolludeamis. 


 

Dát áddá čuovvovaš buvttadusdoarjaga juogadeami jagi 2008:

Aviissat

Buvttadusdoarjja

Simulerejuvvon

Erohus

  

2 007

2 008

2007/2008

Ođđa sámi aviisa

9 381 794

10 453 096

1 071 302

Ságat

4 106 411

7 994 458

3 888 047

Submi

13 488 205

18 447 554

4 959 349

Evttohus addá departemeantta oaivila mielde dakkár juogadeami mii lea muttát aviissaid nuppástuhttinprošeavttaid sturrodaga ektui. Ságat oažžu sullii 3,8 milj. ruvnno lasihit almmustahttima golmma geaddis vahkkui viđa geardái vahkkui (dat mearkkaša sullii 1,9 milj. ruvnno juohke lassealmmuheapmái). Buohtastahttima dihtii namuhit ahte Ássu/Min Áigi oažžu sullii 1 milj. ruvnno lasihit almmustahttima njealji beaivvis viđa beaivái vahkkui. Nuppe dáfus rehkenastá departemeanta ahte Ássu/Min Áigi oažžu jeargguštanvuoittu ovttasteami geažil.

Departemeanta ii evttot maidege rievdadusaid njuolggadusain mat gusket julevsámegiel teavstta doarjagii ja várrejuvvon doarjagiidda. Dat mielddisbuktá earret eará ahte juolludeapmi várrejuvvon doarjagiidda árvvoštallojuvvo bušeahttaoktavuođas dábálaš vuogi mielde.

Sirdásanortnet

Min Ággi ja Áššu ovttasteapmi bohciidahttá erenoamáš gažaldagaid mat čatnasit 2008 doarjaga mearrideapmái. Ovttasteami maŋŋá ferte aviisa (mii lea ožžon nama Ávvir) formálalaččat rehkenastojuvvot ođđa aviisan. Gustojeaddji láhkaásahusa § 3 ektui ii galgga ođđa aviisa leat vuoigaduvvon oažžut doarjaga ovdalgo doarjjaeavttut leat ollašuhttojuvvon unnimusat ovtta kaleanddarjagi. Dasto galgá doarjaga sturrodat mearriduvvot jahkásaš almmuhandávjodaga ektui ja buvttaduvvon siidduid dan jahkásaš logu ektui mii lei jagi ovdal doarjjajagi, ja dan han ii sáhte ođđa aviisa dahkat.

Danne evttoha ge departemeanta 2008 ja 2009 sirdásanortnegin, ahte doarjja rehkenastojuvvo doarjjajagi sámegielat sidduid logu ja almmuhandávjodaga ektui. Preantolohkorevisor ferte dan geažil dárkkistit aviissaid čakčamánus go áigu mearridit almmustahttimiid logu ja sámegielat siidduid logu. Vejolaš rievdadusat jagi loahpas lohkkojuvvojit go doarjja juhkkojuvvo maŋit jagi. Departemeanta vuordá ahte nuppástuhttin beaivválaš aviisan čađahuvvo guovtti jagis.

Mii evttohit dan lassin ahte spiehkastuvvo § 3 goalmmát lađđasa ovttajaginjuolggadusas go dat aviisa mas lea sáhka, ásahuvvo ovttastahtidettiin guokte aviissa mat guktot leat ollašuhttán doarjjaeavttuid unnimusat ovtta kaleanddarjagi. 

Evttohus dagaha dan ahte lea dárbu rievdadit láhkaásahusa sámi aviissaid doarjagiid birra, geahča dán reivve mildosa.  
 
 

Dearvvuođaiguin 
 

Roy Kristiansen f.v.
ekspedišuvdnahoavda 
Ellen Skjærsaker Tauland
ossodatdirektevra 

Milddus