1 Proposišuvnna váldosisdoallu

Gielda- ja ođasmahttindepartemeanta ovddida dán proposišuvnnas rievdadusevttohusa finnmárkkuláhkii. Finnmárkkuláhka gusto Finnmárkku fylkka eatnamiid ja luondduvalljodagaid hálddašeapmái. Stuorradikki geassemánu 8. b. 2017 mannosaš mearrádusa geažil regiovdnaođastusa birra galget Romssa ja Finnmárkku fylkkat ovttastahttojuvvot ođđajagimánu 1. b. 2020 rájes. Ovttastahttima geažil lea dárbu dahkat muhtun rievdadusaid heivehan dihtii finnmárkkulága ođđa fylkajuohkimii.

Heiveheapmi lágas dárbbašuvvo dan hárrái mii guoská dasa manin galgá gohčodit lága geográfalaš doaibmaviidodaga. Departemeanta evttoha rievdadit lága nu ahte das čujuhuvvo Finnmárkku geográfalaš guvlui, mii dál lea Finnmárkku fylka, vai doaibmaguovlu šaddá seammá go dál. Bargamušat mat dálá lága vuođul gullet Finnmárkku fylkkadiggái (earret eará stivralahtuid válljen Finnmárkkuopmodahkii, gozihanlávdegotti válljen ja Finnmárkkuopmodaga opmodatluobaheami dohkkeheapmi dihto dilálašvuođain), evttohuvvojit biddjojuvvot ođđa Romssa ja Finnmárkku fylkkasuohkana fylkkadiggái. Evttohuvvon leat maid heiveheamit njuolggadusain das gii galgá sáhttit leat Finnmárkkuopmodaga vejolaš badjebáhcaga vuostáiváldi, jus stivra mearrida ahte dat galgá juhkkojuvvot.