Bulystmidlar til prosjektet ”Tun +” i Sogndal og Solund

35 prosjekt i heile landet får 32 millionar kroner til å arbeide med bulyst. - Det har vore eit krevjande arbeid å plukke ut dei beste av heile 260 søknader, seier kommunal- og regionalminister Liv Signe Navarsete.

Regjeringa vil at alle i Noreg skal ha høve til å bu der dei ønskjer. Den nye Bulyst-satsinga skal utvikle endå meir attraktive lokalsamfunn over heile landet.

- Søknadsbunken vitnar om at det er eit stort engasjement i heile landet, seier kommunal- og regionalministeren. Det kom inn søknader for i overkant av 200 millionar kroner. Tema som omdømme, kulturbasert stad- og næringsutvikling samt prosjekt for å skaffe bustader går att i mange søknader. Andre tema er tenester, arbeid og medverknad.

I utveljinga av Bulyst-prosjekt har Kommunal- og regionaldepartementet særleg lagt særleg vekt på kvalitet, forankring, nytenking og samarbeid. Viktige målgrupper er ungdom, kvinner og innvandrarar. Også fylkeskommunane har spelt ei viktig rolle i handsaminga av søknader.

TUN+
Gjennom Tun+ skal Høgskolen i Sogn og Fjordane utvikle ein alternativ modell for utforming av bustadområde. Prosjektet får 650 000 kroner i støtte over ein treårsperiode.

Utgangspunktet er at det i strøk med spreidd busetnad er behov for buløysingar som dekkjer dei sosiale behova folk har. Inspirert av tradisjonelle klyngetun skal prosjektet utvikle ein modell med felleshus og aktivitetshus. Tun+ skal ta omsyn til lokal identitet, miljø, natur og ulike brukargrupper. Modellen skal etter planen testast ut i kommunane Solun og Sogndal.

Sogn og Fjordane fylkeskommune trekkjer fram at prosjektet legg til rette for ei nyskapande buform med overføringsverdi.

Fem år med spanande prosjekt i distrikta
- Regjeringa har arbeidd med ulike prosjekt for å skape attraktive lokalsamfunn og bulyst sidan me lanserte Distriktsløftet i 2005. Me har lært kort viktig det er at utviklingsarbeidet er godt forankra, og at fleire aktørar samarbeider. Dette legg me stor vekt på i Bulyst-satsinga, seier Navarsete.

Kommunal- og regionaldepartementet sin pressetelefon: 22 24 25 00.