3.3.1 Gjeldande rett...

3.3.1 Gjeldande rett og saksomfang

All dyrka jord som kan gi grunnlag for lønsam drift skal etter jordlova § 8 haldast i hevd. Finn departementet at dyrka jord er vanhevda eller ligg unytta, kan eigaren eller leigaren givast pålegg om kva tiltak han skal setje i verk for at jorda etter tilhøva kan gi lønsam drift, jf § 8 tredje ledd. Eigaren kan påleggjast å leige bort jorda for ei tid på inntil 10 år.

For dyrka jord som ikkje kan gi grunnlag for lønsam drift, kan departementet gi pålegg om at jorda skal tilplantast med skog, eller tiltak av omsyn til kulturlandskapet.

Om pålegg ikkje er følgt opp når fristen er ute, kan departementet etter jordlova § 8 femte ledd gjere avtale om bortleige av jorda for ei tid på inntil 10 år, eller treffe vedtak om oreigning av delar eller heile eigedomen for å overdra den til andre.

Departementet si myndigheit er overført til kommunen.

Heimelen til oreigning av vanhevda jord har blitt lite brukt. Tal departementet har henta inn viser at heimelen i perioden 1993-2004 blei brukt i to saker.