Ollugat háliidit šaddat oahpaheaddjin, inšenevran ja buohccedivššárin

Almmustahttináigodat Solberga ráđđehus

Almmustahtti: Máhttodepartemeanta

Mánáidgárdeoahpaheaddji ja 1.-7. ceahkki vuođđoskuvllaoahpaheaddji ohppui lea ohcciidlohku lassánan. Seammá guoská reálafága- ja inšenevraohppui. Dan duođaštit Oktasaš sisaváldinlogut.

Oktiibuot 120.000 olbmo ohcet alit ohppui dán jagi. Dat lea sullii 2.800 eanet go diibmá, ja lassáneapmi lea 2,4 proseantta.

-Mun lean duhtavaš go ohcciid lohku alit ohppui joatká ja lean erenoamáš duhtavaš go beroštupmi  oahpaheddjiid-, teknologiija- ja reálafágaohppui positiivvalaččat ovdána, cealká  máhttoministtar Torbjørn Røe Isaksen.

Reálafágat ja teknologiija

Teknologiijafágaide lea ohcciid lohku dán jagi lassánan 5,4 proseantta diimmá loguid ektui.  Das juohkása  8,2 proseantta inšenevraohppui (golbma jagi bachelor)   ja teknologiija masterohppui  4,7 proseantta.  

Reálafágaohppui lea lassáneapmi  sullii 12 proseantta.  

- Reálafágat  ja teknologiija leat máŋga jagi systemáhtalaččat vuoruhuvvon. Servodat dárbbaša divdna inšenevrraid ja muđui reálafágaid gelbbolašvuođa. Danne lean ilus go nu ollu nuorat háliidit dakkár oahpu, cealká máhttoministtar.

Oahpaheaddjioahput

Mánáidgárdeohppui lassánii ohcciid lohku 5,3 proseantta diimmá ektui. Dan čájehit Oktasaš sisaváldin logut. Maiddái 1.-7. ceahki vuođđoskuvlaohppui lassánii ohcciid lohku diimmá loguid ektui. Lassáneapmi lea 2,5 proseantta.

-Lea illudahtti go ná ollugat háliidit šaddat mánáidgárdeoahpaheaddjin ja vuođđoskuvlaoahpaheaddjin.  Dat váikkuha mánáid pedagogalaš fálaldagaide mánáidgárddiin ja skuvllain, dadjá máhttoministtar Torbjørn Røe Isaksen.

Dan rájes go kampánja álggahuvvui (2011 – 2014) lea ohcciid lohku lassánan 5,6 proseanttain sin gaskkas geat mánáidgárdeoahpaheaddjioahpu leat vuoruhan ovddemužžii.  2008 rájes lea lassáneapmi  61,4 proseantta ohcciin geat  oahpaheaddjioahpu leat vuoruhan ovddemužžii.   Lassáneapmi leai stuorimus vihttajagi integrerejuvvon masteroahpus (lektoroahppu), gos lassáneapmi leai 15,9 proseantta diimmá ektui. Buot oahpuid ektui gos leat 1.000 oahpposaji dahje eanet, lea dát stuorimus proseantalassáneapmi ovddit jagi ektui. 

Dearvvašvuođafágaoahput

Dán jagáš ohcciidlogut čájehit ahte ollugat leat ohcan saji dearvvašvuođafágaoahpuide. Logut čájehit ahte ohcciid lohku lea lassánan 6,6 proseanttain go buohtastahttá ovddit jagi loguiguin.

4 452 almmuhuvvon oahpposajiide leat ovdamearkka dihtii 10 518 ohcci vuoruhan buohccedivššároahpu ovddemužžii.  Ohcciid lohku lea lassánan sullii 10,8 proseantta go buohtastahttá ovddit jagiin.

Les flere fakta og hovedtrekk fra søkertallene her

Du kan også lese mer på Samordna opptak