Ollugat háliidit oahpahit smávimusaid

Almmustahttináigodat Solberga ráđđehus

Almmustahtti: Máhttodepartemeanta

Mánáidgárdeoahpaheaddjiohppui leat ohcamat lassánan 5,3 proseanttain diimmá ektui. Dan duođaštit Oktasaš sisaváldinlogut. Maiddái 1.-7.ceahki vuođđoskuvlaoahpaheaddjiohppui leat ohcamat lassánan diimmá ektui. Lassáneapmi lea 2,5 proseantta.

 -Lea illudahtti go eanebut váldet mánáidgárdeoahpaheaddjioahpu ja vuođđoskuvlaoahpaheaddjioahpu. Lea stuora dárbu čeahpes mánáidgárdeoahpaheddjiide ja oahpaheddjiide.  Dat váikkuha mánáid pedagogalaš fálaldagaide mánáidgárddiin ja skuvllain, cealká máhttoministtar Torbjørn Røe Isaksen.

Dan rájes go kampánja álggahuvvui (2011 – 2014) lea ohcciid lohku lassánan 5,6 proseanttain sin gaskkas geat mánáidgárdeoahpaheaddjioahpu leat vuoruhan ovddemužžii.  2008 rájes lea lassáneapmi  61,4 proseantta ohcciin geat  oahpaheaddjioahpu leat vuoruhan ovddemužžii.   Lassáneapmi leai stuorimus vihttajagi integrerejuvvon masteroahpus (lektoroahppu), gos lassáneapmi leai 15,9 proseantta diimmá ektui. Buot oahpuid ektui gos leat 1.000 oahpposaji dahje eanet, lea dát stuorimus proseantalassáneapmi ovddit jagi ektui.  

-Lean hui duhtavaš go ollu oahpaheaddjistudeanttat mearridit váldit masteroahpu álggu rájes juo. Dat addá skuvllaide eanet gelbbolašvuođa, dadjá Røe Larsen.

Oppalohkái lea vuođđoskuvlaoahpaheaddjioahppu daid maŋimuš jagiid vuoittáhallan gilvalettiin eará alit oahpuiguin. Ohcamat 1.-7. ceahkkái leat lassánan 2,5 proseanttain, muhto 5.-10. ceahkkái leat ohcamat njiedjan 2,8 proseanttain go buohtastahttá diimmá loguiguin. Oppalohkái leat ohcamat vuođđoskuvlaoahpaheaddjioahpuide sullii seammá dásis go jagi 2013.

Eai leat nu ollugat geat háliidit váldit fágaoahpaheaddjioahpu. Ohcciid lohku lea njiedjan 6,3 proseanttain diimmá ektui. Ohcciid lassáneapmi mánáidgárdeoahpaheaddjiohppui ii ge leat doarvái gokčat dárbbašlaš oahppan bargonávccaid boahtteáiggis.

-Jos boahtteáiggis galget leat doarvái oahpaheaddjit mánáidgárddiin ja vuođđoskuvllain, de fertejit ohcamat lassánit boahttevaš jagiid. Ráđđehus áigu čuovvolit oahpaheaddjioahpuid masteroahpu, maid ohccit ohcalit. Mihttomearri lea ahte masteroahppu galgá šaddat váldomodeallan, maiddái vuođđoskuvlaoahpaheaddjioahpuide, cealká Røe Larsen.