Ávvudit Vuođđolága neahttasajiin minstemme.no

Fargga leat vássán 200 jagi das go oaččuimet vuođđolágamet, ja dan mii ávvudit miehtá riikka 2014. Neahttasadji minstemme.no lea mávssolaš dan oktavuođas, go mánát ja nuorat ávvudit.

Fargga leat vássán 200 jagi das go oaččuimet vuođđolágamet, ja dan mii ávvudit miehtá riikka 2014. Neahttasadji minstemme.no lea mávssolaš dan oktavuođas, go mánát ja nuorat ávvudit.

– Vuođđolága ávvudeami oktavuođas oažžut áidnalunddot vejolašvuođa digaštallat boahtteáiggi demokratiija ja makkár rolla Vuođđolágas galgá leat boahtteáiggis. Lea mávssolaš, ahte mánát ja nuorat beroštit – ja ahte mii gullat sin oaiviliid, máhttoministtar Torbjørn Røe Isaksen dadjala. 

Máhttodepartemeanta searvá vuođđolágaávvudeapmái dainna, ahte dat juolluda 40 miljovnna kruvnno dutkamii, mas čielggadit maid Vuođđoláhka lea mearkkašan Norgii – ja neahttasaji minstemme.no ráhkadeapmái mánáide ja nuoraide. 

 

Nuoramus Eidsvollas

Jurddaš, jos don livččet 17 jagi boaris ja beasašit leat mielde mearrideamen Vuođđolága. Neahttasajis minstemme.no sáhtát lohkat offiseara Thomas Konow birra, gii lei nuoramus Eidsvolla albmáin.

– Minstemme.no lea gelddolaš neahttasadji, mii lea ráhkaduvvon skuvllaid ja mánáidgárddiid várás, muhto das ii leat gal bajit ahkerádjá. Doppe gávnnat buot dieđuid 1814 birra ja Norgga vuođđolága birra, Røe Isaksen deattasta.

Duorastaga ođđajagemánu 9. beaivve máhttoministtar searvvai neahttasaji minstemme.no ođđasit almmustahttimii Stuorradikkis. Tromssas ledje boahtán Tromstun nuoraidskuvlla oahppit, geat čájehedje mo sii geavahit minstemme.no-neahttasaji.

– Mii sávvat, ahte ollu skuvllat ja mánáidgárddit geavahit neahttasaji vuođđolága ávvudeami oktavuođas, máhttoministtar cealká.

 

 Vuittii gilvvu «Gula mu jiena»

Nujan Hussein (12) vázzá Strømmen skuvlla Arendalas ja son vuittii «Gula mu jiena»-gilvvu (Hør min stemme), maid minstemme.no ja vuođđolága ávvudandoalut lágidedje Arendal-vahkus diibmá geassit. Nujan logai máhttoministarii ja eará guldaleddjiide čállosa, mainna son vuittii.

«Mii fertet jáhkkit alcceseamet. Munnje lea mávssoleamos Norggas, ahte Norga lea demokráhtalaš riika. Son, gii čálii ‘Ja! Vi elsker dette landet’, lea vuoigadis. Mun oaivvildan, ahte Norga galgá ávvudit olles áigge. Sávan lihku Norgii 200 jagiinis.»

Stuorradiggepresideanta Olemic Thommessen ovdanbuvttii vuođđolága ávvudeami almmolaš prográmma.

– Lea suohtas go mánáide ja nuoraide leat plánen nu ollu doaimmaid, ja dakkár vugiin mii sidjiide heive. Sii guddet viidáseappot Norgga demokratiija, ja Vuođđoláhka lea dán demokratiija vuođđun, stuorradiggepresideanta cealká. Son jođiha Vuođđolága 200 jagi ávvudeami váldokomitea. 

Dieđut:

Minstemme.no lea skuvllaid ja mánáidgárddiid várás ráhkaduvvon neahttasadji demokratiija ja searvama birra. Doppe oahppit ja oahpaheaddjit gávdnet bargobihtáid, jearaldatgilvvožiid, filmmaid ja digitála muitalusaid válggaid, demokratiija ja válddi birra. Neahttasaji lea ovddidahttán Senter for IKT i utdanningen ja dan almmustahtte vuosttaš háve njukčamánu 5. b. 2013 jienastanvuoigatvuođa ávvudeami oktavuođas. 

Máhttoministtar Torbjørn Røe Isaksen, Thea Johanne Skogly Sørheim, Jesper Lind-Olsen, Hanna Birgitte Norberg, Emilie Sørensen Linke, Agnhild Johansen ja Jesper Lind Olsen Tromstun nuoraidskuvlla 9. luohkás ja stuorradiggepresideanta Olemic Thommessen. (Govva: Stuorradiggi)