Boazodoallošiehtadusa 2017/2018 šiehtadallamat – Norgga Boazosápmelaččaid Riikkasearvvi gáibádus

Norgga Boazosápmelaččaid Riikkasearvi (NBR) geigii odne iežaset gáibádusa Eanandoallo- ja biebmodepartementii, 2017/2018 boazodoallojagi boazodoallošiehtadussii. Gáibádus lea 143,1 miljovnna kruvnnu, mii lea 28,6 miljovnna eanet go dálá 114,5 miljovnna kruvnnu sturrosaš šiehtadus. Lassáneapmi dahká 25 proseantta.

NBR čujuha gáibádusastis ollu dehálaš ja dárbbašlaš doaibmabijuide mat sihkkarastet   boazodoalu ulbmiliid ahte ovdánit ekologalaš, ekonomalaš ja kultuvrralaš guoddevaš ealáhussan. NBR vuoruha doaibmabijuid mat buorebut sihkkarastet boazodoalu eatnamiid, doaibmabijuid mat nannejit boazodoalu iešstivrenvuoigatvuođa ja iešmearrideami, doaibmabijuid mat sihkkarastet buriid čálgoortnegiid ja DBS-doaimmaid, ja doaibmabijuid mat sihkkarastet boazodoalu guoddevašvuođa boraspiremassimiid oktavuođas.

Dat lea viiddis gáibádus maid NBRa odne lea geigen Stáhtii. Šiehtadallamat šaddet hui gáibideaddji dan geažil go gáibádus lea nu viiddis, ja go ođđa doarjjaortnegat leat evttohuvvon, cealká Stáhta šiehtadallanjoavkku jođiheaddji, Anne Marie Glosli.

Stáhta ovddida iežas fálaldaga guovvamánu 16.b. Šiehtadallamat galget loahpahuvvot ovdal njukčamánu 1.b. 2017. 

Norgga Boazosápmelaččaid Riikkasearvvi (NBR) jođiheaddji Ellinor Marita Jåma geigii NBRa gáibádusa Stáhta šiehtadallanjođiheaddjái Anne Mari Glosli.
Norgga Boazosápmelaččaid Riikkasearvvi (NBR) jođiheaddji Ellinor Marita Jåma geigii NBRa gáibádusa Stáhta šiehtadallanjođiheaddjái Anne Mari Glosli. Govva: Eanandoallo- ja biebmodepartemeanta