Eanet rabasvuohta nationála geahččalemiin

Máhttoministtar Torbjørn Røe Isaksen háliida eanet rabasvuođa nationála geahččalemiid bohtosiin vai gielddat ja váhnemat daid besset aktiivvalaččat geavahit oahpahusa ovddideapmái.

Máhttoministtar Torbjørn Røe Isaksen háliida eanet rabasvuođa nationála geahččalemiid bohtosiin vai gielddat ja váhnemat daid besset aktiivvalaččat geavahit oahpahusa ovddideapmái.

Nationála geahččaleamit čađahuvvojit 5. 8. Ja 9. jahkeceahkis, ja okta ulbmil geahččalemiiguin lea árvvoštallat man bures skuvllat lihkostuvvet buoridit ohppiid vuođđogálggaid. Dál leat nationála geahččalemiid lohkanbohtosat almmuhuvvon, ja čájehit ahte máhtolašvuohta gaskamearálaččat lea veaháš rievdan fylkkain ja stuorimus gielddain. 

-Mii háliidat eanet rabasvuođa nationála geahččalemiid bohtosiin vai gielddat, skuvlajođiheaddjit, gieldastivraáirasat ja váhnemat daid sáhttet geavahit digaštaladettiin movt gielddat sáhttet buoridit oahpahusa.  Danin áigut mii geahčadit álkit vugiid bohtosiid almmuheapmái, cealká Røe Isaksen.

Seammás ii leat son gal mielas dasa ahte bohtosat geavahuvvojit ráhkadit nationála vuoruhemiid.

-Lea uhcán ávki buohtastahttit  Oslo skuvllaid bohtosiid Finnmárkku dahje Telemárkku skuvllaid bohtosiiguin. Bohtosiid galgá baicce geavahit gielddain vai earát ohppet sis geat leat ožžon buriid bohtosiid. Leat olu skuvllat ja oahpaheaddjit geat barget hirbmat buorre barggu ja geat sáhttet leat ovdagovvan eará skuvllaide, dadjá Røe Isaksen.

Boahtte jahkái rievdaduvvojit nationála geahččaleamit vai šaddá vejolaš buohtastahttit  bohtosiid guhkit áiggi.

-Nu movt dál lea, de ii sáhte nationála geahččalemiid atnit vuođđun árvvoštallat leat go skuvllat šaddan čeahpibun oahpahit lohkama, rehketdoalu ja eŋgelasgiela máŋgga jagi badjel.  Jagi 2014 rájes rievdaduvvojit geahččaleamit vai šaddá vejolaš iskat ovdáneami. Dat addá eanet ollislaš gova ja ávkkálaš dieđuid sihke skuvlaeaiggádiidda ja váhnemiidda, cealká Røe Isaksen.