Fidnofágaid vuoruheapmi

Norggas bohtet boahtteáiggis váilut fágabargit. Ráđđehus árvala vuoruhit fidnofágaid áŋgiruššama 93 miljovnna kruvnnuin. Juolludus galgá earret eará geavahuvvot lasihit doarjaga oahpahallifitnodagaide, ja fidnofágaoahpaheddjiid fágalaš lassiohppui.

-Dat ii leat nu ollu maid boahtteáiggi birra sáhtit dadjat, muhto dan mii goitge diehtit ahte mis váilugohtet fágabargit. Dan geažil joatkit fidnofágaloktema, cealká máhttoministtar Torbjørn Røe Isaksen.      

Ráđđehus árvala lasihit oahpahallidoarjaga 50 miljovnna kruvnnuin. Lassáneapmi šaddá juohke oahpahalli ektui sullii 2 500 kruvnnu. Dat lea njealját geardde mii lasihat doarjaga 2014 rájes. 

Jahkásaččat leat gaskal 6 000 ja 8 000 ohcci geat eai oaččo oahpahallisaji.

-Norga han dárbbaša dán lágan bargofámu. Dat ahte oahppit eai oaččo oahpposaji, lea okta dain duođaleamos sivain dasa ahte oahppit eai beasa čađahit joatkkaoahpu. Min ulbmil lea ásahit eanet oahpposajiid, vai eanebut čađahit oahpahusa, dadjá Isaksen. 

Vuoruhat fidnofágaoahpaheddjiid

Ráđđehus lea maid várren 20 miljovnna kruvnnu fidnofágaid oahpaheaddjiloktemii. 

-Mii háliidat addit oahpu alla gelbbolašvuođain fágabargiide mas lea stuora árvu máilmmidásis. Dan geažil áigut sihkkarastit fidnofágaoahpaheddjiide buriid oahppovejolašvuođaid, dadjá Røe Isaksen. 

Ráđđehus lea mearridan stipeandaortnega oahpaheddjiid várás geat barget skuvllas, muhto geain váilu oahpaheaddjioahppu. Ráđđehus árvala dál viiddidit ortnega nu ahte sii geat eai leat vel bargagoahtán skuvllas sáhttet maid ohcat stipeandda. Ulbmil lea rekruteret eanet fidnofágaoahpaheddjiid. Ráđđehus lea maid juolludan ruđaid ovddidit fidnofágaoahpaheddjiid várás ođđa ja áigeguovdileappot gealboovdánahttinfálaldagaid. 

Álkit dohkkehit oahpu maid olgoriikkas lea čađahan

Ráđđehus árvala  várret 17 miljovnna kruvnnu ásahit dohkkehanorgána mii galgá dohkkehit oahpu maid olgoriikkas lea čađahan. Dat veahkeha fágabargiid geat leat čađahan oahpu olgoriikkas johtileappot searvat bargoeallimii. 

Ráđđehus árvala maid lasihit doarjaga oahpahalliide ja oahppokandidáhtaide geain leat erenoamáš dárbbut, guđa miljovnna kruvnnuin. 

Ássanstipeandda dárboárvvoštallan

Ráđđehus árvala maid rievdadit ássanstipeandda dárboárvvoštallanvuogi. Rievdadusat gusket dušše oahpahalliide geat tinejit eanet go 13 000 kruvnnu mánus. Buot oahppit geat tinejit gaskal 13 000 ja sullii 19 500 kruvnnu mánus galget ain oažžut ássanstipeandda, muhto eai nu ollu go ovdal.