Givssideami eastadanáittardeaddji buot fylkkain

– Mun lean ilus go buot fykkat 2018 čavčča rájes ožžot áittardeaddji givssideami eastadeapmái. Áittardeaddjit galget doarjut ja bagadit mánáid, ohppiid ja vánhemiid áššiin mat gusket dasa ahte suddjet givssideami vuostá ja dahkat mánáidgárde- ja skuvlabirrasa buorebun, dadjá diehto- ja integrerenministtar Jan Tore Sanner.

Odne lea máŋgga fylkkas iežaset áittardeaddji givssideami eastadit. Čavčča rájes ásahuvvo našuvnnalaš áittardeaddjiortnet buot mánáide ja ohppiide mánáidgárddis ja skuvllas buot fylkkain givssideami eastadit. Áittardeaddjit galget maid leat mielde oažžut buori ovttasbarggu dálá ohppiid- ja fidnoohppiidáittardeddjiin skuvlabirrasa birra joatkkaoahpahusas. Ođđa ortnet galgá sihkkarastit ahte áittardeaddjit besset bargat bealátkeahttá skuvlaeaiggádis.

Ortnet lea eaktodáhtolaš fylkkasuohkaniidda, muhto buohkat áigot oassálastit. Ortnet ruhtaduvvo gollojuohkinládje gaskal stáhta ja fylkkasuohkaniid, mas stáhta máksá 250 000 ruvnno čavčča rájes ja 500 000 ruvnno ain fylkkasuohkana nammii boahtte jagi. Ortnet ásahuvvui ovttasbarggu bokte Risttalašálbmotbellodagain 2018 bušeahta oktavuođas.

– Áittardeaddjit galget nannet báikkálaš givssidaneastadanbarggu mánáidgárddiin ja skuvllain. Ovttas eará doaimmaiguin maid ráđđehus lea ásahan givssideami vuostá galgá dát váikkuhit dasa ahte mánáid ja oahppiid lohku geat givssiduvvojit unnu, ja ahte sii geat givssiduvvojit ožžot jođáneappot veahki, dadjá Sanner.

Seammás go áittardeaddji givssideami vuostá ásahuvvo buot fylkkain, bidjá ráđđehus johtui čuovusárvvoštallama. Árvvoštallan galgá geavahuvvot dasa ahte addit innspillaid das movt áittardeaddjiortnet berrešii leat dain ođđa regiovnnain 2020 rájes. Ráđđehusa mihttomearri lea oažžut sadjái áittardeaddjiortnega mánáidgárdemánáide, ohppiide ja vánhemiidda, mii lea bistevaš, čalmmus ja olámuttos.

– Givssideami eastadanbargu gáibida guhkesáiggi ja ulbmillaš áŋgiruššama. Olu  mánáidgárddit ja skuvllat barget bures ovdánahttit iežaset gelbbolašvuođa givssidaneastadeami barggus. Go šaddá áittardeaddji buot fylkkain, de ožžot sii deaŧalaš ovttasbargoguoimmi mii maid lea lahka mánáid ja nuoraid, dadjá Hege Nilssen, direktevra Oahpahusdirektotáhtas.

Loga eambbo ráđđehusa barggu birra eastadit givssideami ja láhčit buori oahppanbirrasa