ROBEK birra

Go gielda dahje fylkkagielda devdet eavttuid registrerejuvvot ROBEK:ii gielddalága § 28-1 vuosttaš lađđasa mielde, váikkuha dát sihke departementii, gildii dahje fylkkagildii alcces, ja sin loatnaaddiide ja sin mielkontraheanttaide láigodilis. Vulobealde lea bajilgovva das.

Gielddat ja fylkkagielddat mat leat ROBEK:as galget mearridit doaibmabidjoplána mii sihkkarastá ahte ekonomiija šaddá dásset.

Departemeanta galgá dárkkistit leago gielddas dahje fylkkagielddas mii lea ROBEK:as lobálaš jahkebušeahtta. Jus jahkebušeahtta ii deavdde gielddalága gáibádusaid jahkebušehttii ja departemeanta gomiha dan, de ferte gielda dahje fylkkagielda ráhkadit ođđa jahkebušeahta.

Departemeanta galgá dohkkehit mearrádusaid váldit loana ja mearrádusaid láigohit bistevaš doaibmarusttegiid go láigošiehtadus sáhttá mielddisbuktit goluid guhkit áigái go dan njeallje boahtte bušeahttajahkái ("guhkesáiggi láigošiehtadusat"). Dakkár mearrádusat eai leat dohkálaččat ovdal go departemeanta lea dohkkehan, ja almmá dohkkeheami haga ii leat gielddain iige fylkkagielddain lágalaš vuođđu dahkat loatnašiehtadusa dahje guhkesáiggi láigohanšiehtadusa.

Departemeanta dohkkeha mearrádusaid lonet dan láhkai ahte mearrida bajit rámma lonemii bušeahttajahkái. Departemeanta sáhttá mearridit eavttuid loatnarámma geavaheapmái jus lea dárbbašlaš vuhtii váldit gieldda dahje fylkkagieldda ekonomiija.

Departemeantta váldi dárkkistit bušeahta ja dohkkehit ROBEK gielddaid loanaid ja láigošiehtadusaid lea sirdon stáhtahálddašeaddjái.

Gielddat ja fylkkagielddat mat devdet eavttuid registrerejuvvot ROBEK:ii, galget ovdal go dahket šiehtadusaid, dieđihit šiehtadusbeallái ahte gáibiduvvo dohkkeheapmi mearrádusaide lonet ja dahkat guhkesáiggi láigošiehtadusaid. Gielddat ja fylkkagielddat galget ovdal go dahket loatnašiehtadusaid, maiddái duođaštit lonejeaddjái ahte šiehtadus lea siskkobealde dan dohkkehuvvon loatnarámma ja čuovvu eavttuid maid departemeanta vejolaččat lea bidjan loatnarámma geavaheapmái.

Loatnašiehtadus ii gusto jus lonejeaddji dahje livččii galgan addet ahte loatnaváldin lea allelis go dohkkehuvvon loatnarámma dahje rihkku eavttuid mat loatnarámma vejolaš geavahaneavttuid. Guhkesággi láigošiehtadus ii leat gustovaš ovdal go mearrádus dahkat šiehtadusa lea dohkkehuvvon.

ROBEK-registera dieđut galget leat oahppasat gieldda dahje fylkkagieldda lonejeddjiide/mielkontraheanttaide. Dat galget atnit vuođđun ahte registaris lea positiiva ja negatiiva jáhkehahttivuohta. Dat mearkkaša ahte gieldda dahje fylkkagieldda šiehtadusbealit sáhttet atnit vuođđun ahte gielddain ja fylkkagielddain mat leat registrerejuvvon registarii, lea bággu oažžut dohkkeheami go váldet loana ja dahket guhkesággi láigošiehtadusaid. Ja ahte gielddat ja fylkkagielddaid šiehtadusbealit sáhttet atnit vuođđun ahte gielddain ja fylkkagielddain mat eai leat registrerejuvvon registarii, eai dárbbaš dohkkeheami.