Prošeakta lea leamaš deaŧalaš oassi barggus čalmmustahttit ja vuostálastit vealaheami ja vaššiságaid mat čuhcet sámi ealáhusdoaimmaheddjiide, ja lea ruhtaduvvon Boazodoallošiehtadusa olis sihke 2023:s ja 2024:s.

Prošeakta lea namuhuvvon Ráđđehusa 2025–2030 doaibmaplánas sápmelaččaid cielaheami ja vealaheami vuostá, ja lea leamaš mielde nannemin máhttovuođu boazodoalu birra. Prošeavtta bokte lea ráhkaduvvon sierra diehtojuohkinlávdi, Reinfakta.no, ja maiddái diehtojuohkinfilbmaráidu mat čalmmustahttet boazodoalu mearkkašumi ja hástalusaid.

Prošeavttas bistevaš áŋgiruššamii

2025/2026 Boazodoallošiehtadusas leat šiehtadallanbealit stáhta ja Norgga Boazosápmelaččaid Riikkasearvi soahpan ahte ruhtavárren cielaheami ja rasismma prošektii lasihuvvo oassin NBR organisašuvdnadoarjagii. Dát mearkkaša ahte bargu joatkašuvvá oassin NBR dábálaš doaimmain, iige šat áigeráddjejuvvon prošeaktan.

Dehálaš servodatdoaibma

Boazodoallu lea sámi kultuvrra, giela ja árbevirolaš máhtu guoddi, ja das lea guovddáš sadji sámi servodagas. Seammás čuhcet cielaheapmi, áitagat ja vealaheapmi boazosápmelaččaide máŋgga oktavuođas – sihke almmolaš digaštallamis ja konkrehta riidodilálašvuođain čadnon eanangeavaheapmái ja vuoigatvuođaide.

Prošeavttas, mii ásahuvvui 2022:s, lei ulbmilin čalmmustahttit dáid hástalusaid, ja buoridit  ipmárdusa ja vuhtiiváldima boazodoallu birra ealáhussan ja kultuvrralaš ovdanbuktinvuohkin.

Vuođustuvvon nationála mihttomeriide

Cielaheami ja rasismma vuostálastinbarggu joatkin čuovvu nationála mihttomeriid vealaheami vuosttaldeami ja ovttaveardásašvuođa ovddideami birra. Ráđđehusa 2025–2030 doaibmaplána sápmelaččaid cielaheami ja vealaheami vuostá čujuha ahte lea dárbu lasihit máhtu ja nannet ja koordineret áŋgiruššama sápmelaččaid cielaheami ja vealaheami vuostá buot osiin servodagas.

Geaidnu ovddasguvlui

Norgga Boazosápmelaččaid Riikkasearvi áigu nannet iežas gulahallanbarggu vel eanet boahttevaš jagiid. Dán barggu bokte galgá NBR leat mielde ovddideamen máhtu, árvvusatnima ja dialoga – ja vuostálastit cielaheami ja rasismma boazodolliid vuostá. Dát lea deaŧalaš vai šaddá eanet fátmmasteaddji ja vuoiggalaš servodat, gos sámi ealáhusbargit sáhttet bargat iežaset barggu almmá ballamis vealaheamis dahje cielaheamis.