– Dát lea mearkabeaivi Davvi-Norgga politiijaide, muhto maiddái muđui Norgga politiijaide. Min ulbmil oahpuin lea nannet politiijaid nu ahte ožžot buoret ipmárdusa ja máhtu dustet báikkálaš diliid davvin. Mii sávvat oažžut buriid bohtosiid. Dat lea dehálaš ássiid oadjebasvuhtii ja lea dehálaš dan sihkarpolitihkalaš dilis mas mii dál leat, dadjá justiisa- ja gearggusvuođaministtar Astri Aas-Hansen (Bb).
 
Lea gáibideaddji rekrutteret ja doalahit politiijaid davvin. Danne ásaha ráđđehus ođđa politiijaoahpu Áltái. Oahppu lea lávdaduvvon politiijaoahpu pilohtageahččaleapmi. Sisaváldin lea earrevuđot, ja 18 saji 24 sajis leat várrejuvvon olbmuide geat gullet dan golmma davimus fylkii. Dasa lassin leat guokte saji várrejuvvon olbmuide geain lea sámegielgelbbolašvuohta. Oahppu sáhttá guorahallat báikkálaš ja regionála servodateallima erenoamášvuođaid ja dieinna lágiin dahkat oahpu vel áigeguovdileabbon Finnmárkui ja muđui Davvi-Norgii.
 
– Bargit leat politiijaid deháleamos resursa. Dálá sihkkarvuođapolitihkalaš dilis lea erenoamáš dehálaš ahte politiijaid rekrutteren davvin lea buorre. Dát mielddisbuktá ahte šaddet eanet oahppan politiijat geain lea báikkálaš gullevašvuohta, ja dat fas sáhttá váikkuhit dasa ahte politiijabargit Finnmárkkus eai lotnahuva nu dávjá, dadjá Aas-Hansen
 
2025:s lasihuvvui politiijaid bušeahtta 2,4 miljárdda ruvnnuin. 2021 rájes lea bušeahtta lassánan 5400 miljovnna ruvnnuin, mii lea 26 proseantta lassáneapmi.
 
– Bargiidbellodatráđđehus lea vuoruhan nannet politiijaid. Lea sáhka das ahte sihkkarastit olles riikka oadjebasvuođa, maiddái davvin. Danne leat maiddái Finnmárkku ja Romssa politiijaguovlluid bušeahtat lassánan 50 proseanttain dan rájes go bođiimet fápmui 2021:s, dadjá Astri Aas-Hansen.

Politiijastudeanttat ožžot barggu

– Eai goassege ovdal leat ná olu easkaoahppan politiijat ožžon barggu. Dát ráđđehus lea lasihan politiijastudeanttaid logu ja fuolahan ahte measta buohkain lea politiijabargu. Suorgi lea nannejuvvon, go buohtastahttá dainna movt olgešráđđehus lea geahpedan politiijaoahpu máŋgga geardde. Dat nanne buohkaid oadjebasvuođa Norggas, dadjá justiisa- ja gearggusvuođaministtar. 
 
2013 rájes 2020 rádjái unniduvvui sajiid lohku politiijaallaskuvllas 720 sajis 400 sadjái. Bargiidbellodatráđđehus oaivvilda ahte dát lei boasttu geaidnu. 2022 rájes lasihii ráđđehus sisaváldima Politiijaallaskuvlii 400 oahpposajis 500 oahpposadjái. Dán giđa čađahii 2022-joavku bacheloroahpu. Danne šadde mearkkašahtti eanet easkaoahppan politiijat go ovdal. Politiijadirektoráhta logut suoidnemánu 31. beaivvi čájehit ahte olles 98 proseantta sis geat leat geargan Politiijaallaskuvllas dán jagi leat juo barggus politiijavirggis.
 
Dasa lassin leat 86 studeantta geat leat čađahan dan guokte vuosttaš jagi Politiijaallaskuvllas leamaš barggus geassesadjásaš politiijan geassemánus ja suoidnemánus. Sii mannet dál ruovttoluotta oahpuide loahpahit maŋemus jagi. Ovdal leat nuppi jagi politiijastudeanttat unnán leamaš virgáibiddjon geassesadjásažžan. 

  • Oahppu lea ollesáigge neahtta- ja čoaggananvuđot bacheloroahppu, gos fysalaš searvan lea UiT Norgga árktalaš universitehtas, campus Áltá.
  • 256 ohccis lei dát oahppu Álttás vuosttašvuoruheapmin.
  • Pilohtageahččaleamis leat 24 studeantta geat álget ohppui 2025 čavčča ja loahpahit 2028 giđa.
  • Earreortnegat gusket 20 oahpposadjái 24 oahpposajis: Olbmot geat gullet dan golmma davimus fylkii (18 saji). Olbmot geat máhttet sámegiela (2 saji).
  • Studeanttat galget čađahit hárjehallanoahpu nuppi oahppojagi, nu go politiijastudeanttat muđui. Galgá láhččojuvvot dasa ahte hárjehallanoahppu čađahuvvo ovtta dan golmma davimus politiijaguovllus.
  • Oahppu čađahuvvo gustovaš politiijaoahpu bachelorprográmma mielde.
  • Pilohtageahččaleamis leat vásáhusaid viežžan Ruoŧa politiijaoahpus, mii čađaha sullasaš málle, "polisutbildning på distans” (sámegillii: gáiddus politiijaoahppu). Vásáhusat čájehit ahte studeanttat dain oahpuin birgejit unnimusat seamma bures go studeanttat dábálaš oahpus.
  • Politiijaallaskuvllas leat vihtta campusa. Lea vejolaš váldit bachelorpolitiijaoahpu Álttás, Bådådjos, Oslos ja Stavernas, ja Kongsvingeris ges lea operatiiva joatkka- ja lassioahppu.