− Sávan sámiide ja buot máilmmi álgoálbmogiidda lihku beaivái. Dát beaivi mearkkaša oktiigullevašvuođa máilmmi álgoálbmogiiguin ja sin vuoigatvuođaid árvvusatnima, dadjá gielda- ja guovloministtar Kjersti Stenseng.

Maŋimus jagiid leat máŋgga riikkas leamaš duohtavuođa- ja soabadanproseassat. Norggas lea Stuorradiggi meannudan Duohtavuođa- ja soabadankommišuvnna raportta.

− Ráđđehus lea čuovvuleamen Stuorradikki 16 mearrádusa, ja váldá dan hui duođas. Muhtun mearrádusaid ádjána čuovvulit, earáiguin leat juo bargamin. Soabadeapmi lea guhkes proseassa, ja buorre gulahallan sámi servodagain ja guoskevaš nationála minoritehtaiguin barggus lea dehálaš, dadjá stáhtaráđđi.

ON váldočoahkkin ásahii ON riikkaidgaskasaš álgoálbmotbeaivvi jagi 1994. Dán jagi fáddán lea «álgoálbmogat ja dahkujierbmi: Vuoigatvuođaid suodjaleapmi, boahttevuođa hábmen».

− Dahkujierbmi sáhttá leat stuorra ávkin, ovdamearkka dihtii sámegieloahpahussii ja dasa ahte buoridit bálvalusfálaldagaid sámegillii. Buorre lea go mii leat ovddideamen dahkujierpmi maiddái sámi servodahkii, dadjá Kjersti Stenseng.