Olahan dihte mihtu njuovvat 71 000 bohcco, jotkojuvvo buvttadandoarjja, miessenjuovvandoarjja lasihuvvo, ja ásahuvvo ođđa doarjjaortnet orohagaide mat bidjet njuovvan- ja buvttadangáibádusaid iežaset doaibmanjuolggadusaide. Dat addá orohagaide čielga láidehusa buorebut plánet njuovvama ja sihkkarastit bissovaš ja guoddevaš boazologu. Dasa lassin lasihuvvo fievrredandoarjja vai boazoeaiggádiidda šaddá álkit lágidit bohccuid njuovahagaide. Innovasjon Norge ja Eanandoallodirektoráhtta galget maid árvvoštallat doaibmabijuid mat sáhttet buoridit njuovvankapasitehta ávkkástallama Finnmárkkus ja sihkkarastit njuovvama miehtá njuovvanáigodaga. Dasa lassin galgá Bohccobierggu márkanlávdegoddi viidáseappot ovdánahttit ollislaš ja guhkesáigásaš strategiija man ulbmiliin lea nannet bohccobierggu sajádaga biergomárkaniin.

Eanet njuovvan lágida diliid guoddevaš boazodollui  mii lea heivehuvvon guohtuneatnamiidda. Go boazolohku lea stuorát go orohaga guoddinnákca, de hedjonit guohtumat dađi mielde, mii dagaha elliidčálggu ovdii, unnida buvttadeami ja lasiha riidduid. Nuppi dáfus de beare vuollegis boazolohku ges mearkkaša ahte resurssat ávkkástallojuvvojit beare hejot, ja ahte ekonomiija hedjona. Dieđihuvvon boazologut čájehit ahte máŋgga orohagas Finnmárkkus lea boazolohku badjelis mearriduvvon logu. Boazodoallostivra čuovvola dál guoskevaš orohagaid boazodoallolága ođđa unnidanmearrádusaid mielde.

Dán jagi šiehtadus ovttastahttá ekonomalaš váikkuhandoaimmaid maid ulbmil lea lasihit njuovvama doaimmaiguin maid ulbmil lea heivehit boazologu guohtunresurssaide. Nu lágida šiehtadus diliid boazodollui mii lea eanet gánnáhahtti, ceavzil ja áiggi vuollái guoddevaš.