boazosuvdin
Juohke giđa ja čavčča fievrreduvvojit birrasii 8000 bohcco sulluide Romssa ja Finnmárkku rittus. Boazosuvdimii atnet suodjalusa ovddeš suvdinfatnasa. Govva: Eanadoallodirektoráhtta

Leat máŋga orohaga mat dárbbašit suvdit, beassan dihte ruoktot ovdán geasseorohagaide. Dán jagáš boazosuvdin álggii cuoŋománu 20. beaivvi ja bistá miessemánu 3. beaivái. Boazosuvdimii atnet suodjalusa ovddeš suvdinfatnasa, mas dál lea priváhta oamasteaddji. Suvdinfatnasii čáhket 500 bohcco hávális.

Boazoeaiggádat geat dárbbašit suvdima, ohcet Romssa ja Finnmárkku stáhtahálddašeaddjis. Stáhtahálddašeaddji árvvoštallá suvdinohcamiid siidaosiid dárbbu vuođul ja makkár árbevirolaš geavaheapmi sis lea guovlluide gosa suvdet.

Lea jahkásaš boazodoallošiehtadus, gaskal Eanadoallo- ja biebmodepartemeanta ja Norgga boazosápmelaččaid riikasearvvi (NBR), mii ruhtada suvdinortnega. Dasa lassin máksá juohke siidaoassi suvdindivvaga, 30 ruvnno bohccos. 2026/2027 boazodoallošiehtadusas lea várrejuvvon guhtta millijovnna boazosuvdimii. Lea maid šiehtaduvvon ahte Eanadoallodirektoráhta 2027 rájes váldá badjelasas stáhtahálddašeaddji boazosuvdinhálddašanbargguid. Boazodolliide eai leat plánejuvvon nuppástusat, ja sis galgá ain vejolašvuohta suvdit.

  • Boazosuvdin lea fievrridanortnet boazodolliide dain orohagain/siiddain gos dárbbašit fievrredit bohccuid rastá meara geasseorohagaide ja fas ruovttoluotta čakčat.
  • Sullot ja njárggat leat árbevirolaččat geavahuvvon boazoguohtoneatnamiin. Ovdalaš áigge vuojahedje bohccuid nuriid ja vuonaid rastá. Romssa ja Finnmárkku boazodollui šattai boazosuvdin fásta ortnegiin 1970-logu rájes. Suvdimii šattai dárbu danne go iešguđetlágan doaimmat ja huksemat giddejedje árbevirolaš johtingeainnuid. Suvdinfanas álkidii johtima sulluide. Dál lea priváhta fitnodat mii oamasta ja doaimmaha suvdinfatnasa.
  • Romssa ja Finnmárkku stáhtahálddašeaddji mearrida ja pláne boazosuvdima. Plánas sii vuoruhit daid siidaosiid geaidda lea juolluduvvon suvdin. Plánas leat áigemearit ja suvdinsajit. Suvdinsajiin ferte leat dárbbašlaš infrastruktuvra, mii lea elliidsuodjaluslága gáibádusaid mielde.
  • Leat sullii 8000 bohcco mat fievrreduvvojit juohke giđa ja čavčča sulluide ja njárggaide Romssas ja Finnmárkkus.